Радаваліся нядоўга. У Беларусь вярнулася інфляцыя
У Беларусі зноў зафіксаваная месячная інфляцыя. Раней беларускія чыноўнікі і прапагандысты радасна рапартавалі, што па выніках траўня ў краіне назіралася зніжэнне індэксу спажывецкіх цэнаў (ІСЦ) на 0,3%. Па выніках чэрвеня ІСЦ вырас на тыя ж 0,3%.
Тэмпы базавай інфляцыі павялічыліся. Базавы індэкс спажывецкіх цэн, які выключае змяненне цэн на асобныя тавары і паслугі, схільныя ўплыву фактараў адміністрацыйнага і сезоннага характару, за чэрвень вырас на 0,4%, а ў параўнанні са снежнем мінулага года — на 2%.
Гадавая інфляцыя па выніках паўгоддзя запаволілася да 2,9% супраць 3,7% у траўні. З пачатку года ІСЦ вырас на 3%.
Цэны на харчовыя тавары ў чэрвені выраслі на 0,2% да траўня, з пачатку года рост коштаў складае 3,1%. Рост коштаў на ежу ў гадавым вылічэнні (да чэрвеня 2022 года) склаў 3,6%.
У прыватнасці, у чэрвені цэны на гародніну выраслі на 1,1% у параўнанні з траўнем, на малако і малочныя прадукты — на 0,8%, мяса і мяса прадукты — на 0,3%. Разам з тым садавіна патаннела на 4,7%.
Глядзіце таксама
Цэны на нехарчовыя тавары не змяніліся да траўня, а з пачатку года падаражэлі на 0,9%.
У чэрвені цэны на лекі выраслі на 1,1% у параўнанні з траўнем. Цэны на сінтэтычныя мыйныя сродкі знізіліся на 0,5%, парфумерна-касметычныя тавары — на 0,7%, тэлевізары – на 3,6%.
Тарыфы на паслугі выраслі на 0,9% да траўня, на 5,5% з пачатку года і 6,9% у гадавым выражэнні.
У чэрвені паслугі дашкольных устаноў падаражэлі на 9,3% у параўнанні з траўнем, санаторна-аздараўленчыя паслугі — на 7,8%, паслугі паветранага транспарту — на 6,8%, на турыстычныя паслугі — на 5,5%.
Глядзіце таксама
