Санкцыі не працуюць? Беларускі «Сбер банк» збіраецца даставаць чыпы з нявыкарыстаных картак
Раней на такія дзеянні пайшоў расійскі «Сбер»: праз дэфіцыт чыпаў для новых картак было вырашана даставаць іх са старых, якія не былі выкарыстаныя.
Ілюстрацыйнае фота Дзмітрыя Дзмітрыева
Як паведамляе «Office Life», чыпы са старых картак збіраюцца ставіць у новыя карткі плацёжных сістэм «Белкарт» і «МИР». Паводле слоў старшыні праўлення «Сбер Банка» Ігара Мяркулава, нявыкарыстаных картак, якія можна было «разабраць», у іх каля 200 тысяч.
Праз санкцыі банкі сутыкнуліся з дэфіцытам матэрыялаў для новых картак і таму вымушана падаўжаюць тэрміны дзеяння старых. Але праблемы ўзніклі не толькі з банкаўскімі карткамі, а таксама і з грашовымі пераводамі: ад пачатку расійскага ўварвання ва Украіну ў Беларусі не працуе міжнародная сістэма пераводаў «Western Union», а зусім нядаўна «Белгазпрамбанк» спыніў працу з «Юністрымам».
У канцы жніўня банк «БелВЭБ» увёў камісію за выдачу наяўных ва ўласных банкаматах — камісія складае 0,7% ад сумы, але не меней за 7 рублёў. Банк «ВТБ (Беларусь)» у чэрвені ўвёў абмежаванні на выдачу наяўных у банкаматах для трымальнікаў картак «МИР» — максімум 5 рублёў за адну транзакцыю.
А вось, напрыклад, «Белінвестбанк» увогуле адключаны ад сістэмы SWIFT. Уладальнікі картак гэтага банка не могуць ажыццяўляць безнаяўныя грашовыя пераводы нават унутры краіны, але імі па-ранейшаму можна расплочвацца ў крамах.