Yara спыніць закупкі ў «Беларуськалія»
Асноўны партнёр «Беларуськалія» нарвежская кампанія Yara ў выніку заходніх санкцый супраць беларускага рэжыму ініцыявала згортванне закупачнай дзейнасці. Чакаецца, што яно будзе завершана да 1 красавіка 2022 года.
«Yara цвёрда адданая ўсеагульным правам чалавека і асуджае ўсе формы рэпрэсій і парушэнняў правоў чалавека. Пры падтрымцы праваабарончых арганізацый і прафсаюзаў Yara імкнулася да пазітыўных перамен, выкарыстоўваючы сваю прысутнасць у Беларусі для прасоўвання тэхнікі бяспекі і захавання правоў чалавека. Аднак уплыў на ланцужок паставак бягучых санкцый у дачыненні да Беларусі вымусіў Yara ініцыяваць згортванне паставак беларускага калію, ключавога інгрэдыента для вытворчасці мінеральных угнаенняў, якія выкарыстоўваюцца ў вытворчасці прадуктаў харчавання», — гаворыцца ў заяве кампаніі.
Нягледзячы на згортванне паставак калію, Yara мае намер працягнуць рэалізацыю праграмы прамысловай бяспекі, распачатай у 2021 годзе, у цесным супрацоўніцтве з незалежным прафсаюзам «Беларуськалія».