Аб'яднанне хакераў здабыла матэрыялы праслухоўвання турэмных камер

Ініцыятыва рэвалюцыйных хакераў прадставіла доказы, што камеры ў многіх беларускіх ізалятарах маюць «вушы». Тэхнічныя прыстасаванні дапамагаюць міліцэйскім агентам, засланым у камеру, фіксаваць інфармацыю пасля правакавання людзей на адкрыты дыялог, піша «Свабода».

У многіх турэмных камерах у Беларусі ўстаноўлены мікрафоны. Туды змяшчаюць людзей, ад якіх хочуць атрымаць прызнанне або даведацца іншую каштоўную інфармацыю. Да іх падсылаюць «засланага казачка», які ўціраецца ў давер, паведамляюць хакеры.

«Цяпер запісы з турэмных камер у руках руху «Супраціў». На праслушцы стаяць ІЧУ Акрэсціна, СІЗА-1, ЦІП, Смалявічы, Салігорск, Маладзечна, Барысаў, Слуцк, Пухавічы, Жодзіна-8, Мядзел, Стоўбцы, Капыль, ІЧУ Сельск і іншыя ўстановы. Мы выкарыстоўваем атрыманыя дадзеныя, каб выкрываць «казачкоў» і схемы іх працы», — дадаюць яны.

У якасьці доказу да матэрыялаў прымацаваныя ўрыўкі запісаў праслухоўвання затрыманых супрацоўнікаў PandaDoc (на фота), дзе яны прызнаюцца, што ніякага злачынства не здзяйснялі, і іх проста рэпрэсуюць. А таксама запісы людзей, якія спяваюць, і турма іх не зламала.

Раней пра тое, што ягоныя размовы ў камэры слухалі, казаў палітвязень, галоўны рэдактар «Нашай нівы» Ягор Марціновіч.