Абаненты МТС патрабуюць вяртання беларускамоўнай версіі сайта

Абаненты МТС патрабуюць ад кампаніі вярнуць беларускамоўную версію сайта. Адпаведная петыцыя з’явілася на партале change.org.

mts_konnekt.jpg


Стваральнік петыцыі Аляксандр Кошаль адзначае, што «ўжо другое дзесяцігоддзе» ён і шмат іншых беларускамоўных людзей карыстаюцца паслугамі мабільнага аператара СТАА «Мабільныя ТэлеСістэмы». «За гэты час вядома, што ў мяне былі спакусы змяніць аператара. Але якасць сувязі і ўважлівае стаўленне да абанента прымушалі вярнуцца назад. Мяне засмучаў толькі адзін факт: пераклад сайта кампаніі быў зроблены не цалкам на беларускую мову. Гэта значыць, што мала таго, што былі хібы (памылкі друку, недакладнасці ў тэрміналогіі і інш.) у перакладзе, дык яшчэ і шмат чаго прапаноўвалася абаненту толькі на рускай мове. Склалася ўражанне, што пераклад на беларускую мову быў зроблены для «птушачкі». Маўляў мы зрабілі так, як зрабілі, а вы там хочаце карыстайцеся, хочаце не», — заўважае аўтар петыцыі.


А не так даўно, піша Кошаль, «беларускамоўная версія сайта зусім знікла». «Калі звярнуўся ў кампанію, каб растлумачылі, чаму так адбылося, мне адказалі, што зараз яны не паспяваюць у сувязі з тым, што ідзе дэнамінацыя. Шкада, што ў нас такое стаўленне да роднай мовы... Шмат аператараў у Еўропе маюць шматмоўную версію сайтаў, але ці можна ўявіць сабе такі адказ?», — задаецца пытаннем Кошаль.


У сувязі з гэтым ён прапануе карыстальнікам МТС і іншым беларусам падпісаць петыцыю з чатырма патрабаваннямі.

 

1. Цалкам перакласці сайт СТАА «Мабільныя ТэлеСістэмы» (мабільную і звычайную версію сайта) на беларускую мову на прафесійным узроўні (з удзелам прафесійных перакладчыкаў) і прытрымлівацца адзінай тэрміналогіі.


2. Зноў зрабіць даступнай беларускамоўную версію сайта http://mts.by.


3. Разглядзець магчымасць загрузкі сайта mts.by першапачаткова на беларускай мове з магчымасцю абіраць рускую ці англійскую мову па жаданні абанента.



4. Укараняць іншыя метады, накіраваныя на пашырэнне выкарыстання беларускай мовы ў кампаніі (буклеты з тарыфамі, артыкулы ў часопісе «АЛЛО» і г.д.).


«Вельмі спадзяюся, што мая петыцыя знойдзе падтрымку, а кіраўніцтва кампаніі МТС зразумее, што беларуская мова мае такія ж роўныя правы на існаванне, як і руская», — зазначае Кошаль.


Варта зазначыць, што кантрольны пакет (51% акцый) СТАА «Мабільныя ТэлеСістэмы» (МТС) належыць дзяржаве. Чаму фактычна дзяржаўная кампанія ігнаруе дзяржаўную мову?