Аляксандр Азараў: Не сведчыце супраць сябе

Прадстаўнік Кабінета Святланы Ціханоўскай Аляксандр Азараў даў пэўныя парады наконт бяспекі для беларусаў.

Асабліва гэтыя парады будуць карысныя тым, хто вырашыў сфатаграфаваць расійскую ваенную тэхніку: любое фота пратэставай грамадскай актыўнасці ці бел-чырвона-белай стужкі цяпер даводзіцца рабіць асцярожна, а тым больш дасылаць у тэлеграм-каналы, якія былі прызнаны ўладамі экстрэмісцкімі.

• Уважліва вывучыце мясцовасць, дзе плануеце весці здымкі, на прадмет наяўнасці камер.
• Не дапускайце, каб знятым фота і відэа прысвойваліся звесткі аб геалакацыі.
• Адключыце опцыю стварэння ў воблачным сховішчы вашай прылады гісторыі фота- і відэаздымкаў.
• Выдаляйце фота і відэа адразу пасля адпраўкі.
• Адключыце геалакацыю на вашай прыладзе.
• Да здымкі трымайце прыладу выключанай, падчас здымкі перавядзіце ў авіярэжым.
• Выкарыстоўвайце vpn.
• Пасля выдалення перапіскі ачышчайце кэш-памяць.
• Пры затрыманні не сведчыце супраць сябе, адмаўляйцеся даваць паказанні.

Беларусаў не раз арыштоўвалі за фота ваеннай расійскай тэхнікі на тэрыторыі нашай краіны. Так, напрыклад, тры гады калоніі ўзмоцненага рэжыму ў верасні 2022-га далі палітвязню Віктару Кулінку за тое, што ён дасылаў здымкі расійскай вайсковай тэхнікі «экстрэмісцкаму» ТГ-каналу. Мужчыну затрымалі 30 траўня па падазрэнні ў «спрыянні экстрэмісцкай дзейнасці».