У Наваполацку арыштавалі сяброў стачкама ААТ «Нафтан»

Сёння, 23 студзеня, у Наваполацку падчас правядзення трэніроўкі ў спартыўным клубе «Форвард» быў затрыманы ўдзельнік стачкама ААТ «Нафтан» Сяргей Лапуноў, паведамляе фэйсбук «Стачкам ААТ "Нафтан"».

Лапунову інкрымінуюць правядзенне пікета. Відавочна, пад пікетам маецца на ўвазе відэа, напярэдадні запісанае сябрамі страйкама «Нафтана» ў падтрымку галасавання на платформе «Голас».
Сяргей Лапуноў з’яўляецца работнікам ААТ «Нафтан». Стаж працы — 20 гадоў. З 12 снежня далучыўся да рэспубліканскай стачкі.

Таксама затрымалі Андрэя Шкірэнку, работніка ААТ «Нафтан» з рабочым стажам 30 гадоў, які далучыўся да рэспубліканскай стачкі 4 снежня 2020 года. Андрэй таксама з’яўляецца намеснікам старшыні першаснай арганізацыі «Беларускага незалежнага прафсаюза» на ААТ «Нафтан». Сёння супрацоўнікі праваахоўных органаў наведалі кватэры і іншых чальцоў стачкама, але не засталі іх дома.
racyja.com