Дзяніс Івашын: Не хачу быць дэкарацыяй у гэтым цырку

Палітзняволены журналіст Дзяніс Івашын атрымаў спатканне з маці. Людміла Мікалаеўна расказала «Новаму Часу», як прайшла іх першая за паўтара года сустрэча.
Дзяніс Івашын. Фота з фэйсбуку жонкі палітвязня Вольгі Івашынай

Дзяніс Івашын. Фота з фэйсбуку жонкі палітвязня Вольгі Івашынай


Палітвязню Дзянісу Івашыну, журналісту-расследавальніку і аўтару «Новага часу», 14 верасня суд Гродзенскага раёна прысудзіў 13 гадоў і 1 месяц калоніі, а таксама штраф у 150 базавых велічынь. Сёння Дзяніс атрымаў першае спатканне з маці.

Людміла Мікалаеўна кажа, што Дзяніс выглядае бадзёра, трымаецца на пазітыве і не верыць тым лічбам, якія ўчора агучыў суддзя. «Зарад бадзёрасці», паводле слоў жанчыны, перадаўся і ёй:

— Я засталася задаволеная спатканнем. Чакала ўбачыць Дзяніса ў горшым стане, але маё дзіця ўсё на пазітыве, ён яшчэ і мне добрага настрою задаў, таму я засталася вельмі задаволеная сустрэчай і размовай. І мне зараз нашмат лягчэй, бо, калі я яго не бачыла паўтара года, канешне, сказаць, што на душы коткі шкрабалі — гэта нічога не сказаць. Я вельмі перажывала, як ён выглядае, як сябе адчувае. Сёння, убачыўшы яго, паразмаўляўшы, я трохі супакоілася. У яго нязломны стрыжань.
На пытанне, як Дзяніс успрыняў свой прысуд, маці адказвае, што ён лічыць гэта смехам і цыркам: справа пабудаваная на здагадках — «дзесьці хтосьці, незразумела ў якім месцы — ніякай канкрэтыкі». Непрыемнай навіной для Людмілы Мікалаеўны было тое, што пракурорка запатрабавала на самой справе 9 гадоў і 1 месяц пазбаўлення волі, але суддзі з нейкіх меркаванняў гэтага аказалася мала.

Дзяніс Івашын з маці і бабуляй. Фота з фэйсбуку жонкі палітвязня Вольгі Івашынай

Дзяніс Івашын з маці і бабуляй. Фота з фэйсбуку жонкі палітвязня Вольгі Івашынай


Ад удзелу ў судзе, гаворыць жанчына, Дзяніс увогуле адмовіўся:

— Сказаў, што не хоча быць вінцікам, дэкарацыяй у гэтым цырку. Гэта проста смех, проста цырк, у якім яго, на жаль, прымушалі ўдзельнічаць.



Так што ён вельмі спакойна паставіўся да ўсіх гэтых лічбаў, бо цудоўна разумее, што ніхто — ні з палітычных зняволеных, ні з іншых, якія атрымалі незаслужаныя, незаконныя абвінавачанні ад гэтага рэжыму, не будзе сядзець указаныя тэрміны. Усё скончыцца нашмат раней. Гэта не разумее толькі дурны чалавек.

Таксама Дзяніс перадае вялікую падзяку ўсім, хто пра яго памятае, хто яму піша (але ён, на жаль, лістоў не атрымліваў і не атрымлівае). Асабліва адзначыў «Беларускую асацыяцыю журналістаў»: вялікі дзякуй ім за ўвагу да яго асобы. Агромністы дзякуй любімаму «Новаму Часу» і ўсім-усім неабыякавым, хто падтрымлівалі і дапамагалі нам чым маглі, гаворыць маці палітвязня.

Міжнародная федэрацыя журналістаў і Еўрапейская федэрацыя журналістаў асудзілі вынесены Дзянісу Івашыну прысуд. Яны назвалі судовы працэс над Івашыным «чыстай вады пародыяй» і запатрабавалі неадкладнага вызвалення журналіста.


 

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: