«Экалагічныя экстрэмісты»? «Экадом» прызналі экстрэмісцкім фарміраваннем

Па рашэнні КДБ ад 17 кастрычніка беларуская экалагічная арганізацыя «Экадом» і яе старонкі ў сацсетках прызнаныя экстрэмісцкім фарміраваннем.

happy_earth_day_poster_landscape_e1659002073114.jpg


«Экадом» — гэта адна з найстарэйшых экалагічных арганізацый у Беларусі, яна была заснаваная ў 1996 годзе для прасоўвання экалагічна дружалюбнага ладу жыцця і ідэй устойлівага развіцця.

26 ліпеня 2021 года стала вядома, што Міністэрства юстыцыі падало ў суд іскавую заяву аб ліквідацыі ГА «Экадом», а 31 жніўня Вярхоўны суд прыняў рашэнне ліквідаваць арганізацыю. У арганізацыі гэтае рашэнне лічаць неабгрунтаваным, незаконным і палітычна матываваным.

Сваю дзейнасць арганізацыя засноўвала на прынцыпах устойлівага развіцця, дэмакратыі, павагі правоў чалавека і гендарнай роўнасці.

21 кастрычніка ліквідацыя «Экадома» на сустрэчы бакоў Орхускай канвенцыі была прызнана пераследам за рэалізацыю ёю правоў па Канвенцыі.


Таксама экстрэмісцкім фарміраваннем прызнаная арганізацыя «Дапамога», зарэгістраваная ў Літве.

Адначасова Генпракуратура прызнала экстрэмісцкімі матэрыяламі інтэрнэт-рэсурсы «Форуму дэмакратычных сіл».

«Па заяве пракуратуры горада Мінска інфармацыйная прадукцыя Telegram-канала "Belarusforum.оrg" і інтэрнэт-сайта "Форум дэмакратычных сіл" прызнаная экстрэмісцкімі матэрыяламі», — праінфармавалі ў Генпракуратуры.

Трэба адзначыць, што сайт «Форуму дэмакратычных сіл Беларусі» прызнаны «экстрэмісцкім» ужо двойчы — першы раз такое прызнанне адбылося яшчэ 9 чэрвеня гэтага года.

Адным з ініцыятараў «Форуму дэмакратычных сіл» з'яўляецца экс-прэтэндэнт на пасаду прэзідэнта Беларусі, былы кіраўнік Парку высокіх тэхналогій Валерый Цапкала.