Інтэрпол выдаліў з базы беларуса, якога беларускія сілавікі абвясцілі ў міжнародны вышук

Інтэрпол выдаліў з сваёй базы даных беларуса Макарыя Малахоўскага, якога беларускія сілавікі абвясцілі ў міжнародны вышук, а польскія сілавікі затрымлівалі па гэтай прычыне, піша www.the-village.me.

Пра тое, што Макарыя Малахоўскага выключылі з базы, паведаміў актывіст Алесь Міхалевіч на сваёй старонцы ў Фэйсбуку.

"Мы атрымалі ліст ад Генеральнага сакратарыята Інтэрпола, які пацвярджае выдаленне звестак Макарыя з базы міжнароднага вышуку", — напісаў Алесь.

У Беларусі на Макарыя Малахоўскага была заведзеная крымінальная справа за "гвалт або пагрозу гвалту" ў дачыненні да сілавіка. Па версіі беларускага боку, 13 жніўня 2020 года ён нібыта наехаў на супрацоўніка ДПС. Супрацоўнікі польскай паліцыі затрымалі Малахоўскага ў верасні гэтага года па запыце пракуратуры Беларусі, але на наступны дзень адпусцілі — Макарый патлумачыў, што крымінальная справа, распачатая супраць яго ў Беларусі, палітычна матываваная.