«Калі б хацелі — мы б вас акупавалі». Кантэміраўская дывізія пакідае Беларусь
Сёння на станцыі Верайцы пачалася пагрузка бронетэхнікі Кантэміраўскай дывізіі 1-й танкавай арміі, што ўдзельнічала ў вучэннях «Захад-2017» на тэрыторыі Беларусі. Расійскія вайскоўцы вяртаюцца дадому.
Танкі Кантэміраўскай дывізіі на станцыі Верайцы
Пагрузка, якая пачалася яшчэ ў першай палове дня 20 верасня,
адбываецца ля пасажырскай станцыі на вачах мясцовых жыхароў. Тэхніку
таксама добра бачна і з электрычак, што курсуюць паміж Асіповічамі і
Мінскам.
Расійская тэхніка ў Верайцах
«Усіх ворагаў перамаглі — вось і зʼязджаем», — жартуе расійскі капітан, якога мы сустракаем у краме ля станцыі.
Патруль беларускай камендатуры тлумачыць нам: тыя падраздзяленні, баявая задача якіх ужо была выканана, пачалі пагрузку сёння, яшчэ да афіцыйнага завяршэння манеўраў. Але частка расійскіх вайскоўцаў пакуль застаецца на палігоне.
Расійская тэхніка ў Верайцах
20 верасня ў Верайцах грузіцца Ямпольскі мотастралковы полк Кантэміраўскай дывізіі — байцы з адпаведнымі нашыўкамі нясуць варту з абодвух бакоў чыгункі.
«Жылі мы тут у намётах, побач з палігонам. Шмат нас было.
А цяпер вось вяртаемся… Вучэнні прайшлі паспяхова», — распавядае
шараговец Ямпольскага палку Андрэй.
Наш суразмоўца — кантрактнік, служыць у войску 1,5 гады. Нарадзіўся ён ва ўкраінскім Днепрапятроўску (цяпер — Днепр), але пражыў усе жыццё ў Расіі. Андрэй упэўнены: Расія — наймагутнейшая краіна ў свеце.
Тым часам кіроўца таксоўкі, што падвозіў нас да Верайцоў, прыгадвае:
Нагадаем, 20 верасня — фінальны дзень сумесных стратэгічных манеўраў «Захад-2017». Цяпер, паводле інфармацыі Мінабароны, цягам дзесяці дзён расейскія войскі мусяць пакінуць тэрыторыю Беларусі, а беларускія — вярнуцца ў месцы пастаяннай дыслакацыі.
Сёлета да вучэнняў «Захад-2017» была прыкаваная асаблівая ўвага міжнароднай супольнасці. Беларускі бок акрэдытаваў назіральнікаў з 5 краін НАТА і Украіны, а таксама 280 журналістаў.
На брыфінгах прадстаўнікі Мінабароны неаднаразова падкрэслівалі празрыстасць усіх мерапрыемстваў, звязаных з «Захадам-2017». Разам з тым, на адмыслова створаным сайце, акрамя колькасці расійскіх вайскоўцаў (12 700 чалавек) не паведамляліся важныя дэталі.
Напрыклад, не была апублікаваная інфармацыя пра канкрэтныя падраздзяленні 1-й танкавай арміі, што бралі ўдзел у манеўрах, не ўдакладнялася, на які аэрадром прыбывала расійская авіяцыя.
Ігар Ільяш, Кацярына Андрэева; belsat.eu