«Вясна» абвясціла конкурс мастацкіх работ для месцаў несвабоды
Праваабарончы цэнтр «Вясна» абвяшчае конкурс мастацкіх работ зняволеных папраўчых устаноў і іншых месцаў несвабоды.
Фота ілюстрацыйнае: Крыніца: FOR.kg
Да ўдзелу ў конкурсе запрашаюцца зняволеныя папраўчых устаноў і іншых месцаў несвабоды — ЛПП, устаноў адукацыі і аховы здароўя закрытага тыпу.
Конкурс мае выключна некамерцыйны характар выкарыстання перададзеных работ; перададзеныя работы аўтарам, як правіла*, не вяртаюцца.
Конкурс праводзіцца ў некалькі этапаў:
— 14 студзеня — абвяшчэнне конкурсу;
— да 2 красавіка — збор працаў на конкурс;
— 15 красавіка — адкрыццё выставы перададзеных работ і абвяшчэнне пераможцы конкурсу.
Работы будуць выстаўленыя з 15 красавіка на працягу як мінімум аднаго месяца ў памяшканні кансультацыйна-інфармацыйнай установы па папулярызацыі прававой культуры «Тэрыторыя правоў»; выстава будзе адкрыта для бясплатнага наведвання. У далейшым работы, якія паступілі на конкурс, будуць выкарыстаныя ў выставах, арганізатарам або суарганізатарам якіх будзе з'яўляцца ПЦ «Вясна» на тэрыторыі Рэспублікі Беларусь і за мяжой.
Працы могуць быць выкананы ў любой тэхніцы выяўленчага мастацтва, у любым памеры і па любой тэматыцы.
Да прац можа прыкладацца тлумачальны тэкст ці тэкст-разважанне, або гісторыя аўтара.
Да ўдзелу ў конкурсе не дапускаюцца творы, якія парушаюць нормы маралі або права, якія распальваюць нянавісць або варожасць па якой-небудзь прыкмеце, а таксама заклікаюць да гвалтоўных дзеянняў.
Пераможцаў конкурсу вызначае журы. Тром пераможцам прысуджаюцца два прызы па 100 рублёў і галоўны прыз — 200 рублёў.
Прызы пералічваюцца на рахунак пераможцаў паштовым пераводам.
Звяртацца на адрас: 220012, г. Мінск, вул. Мяржынскага, 8 - 26. ПЦ «Вясна».
Тэлефон для даведак: (017) 394 63 11.
*Са згоды арганізатара, на конкурс можа быць перададзена праца на ўмовах зваротнасці
spring96.org