Міліцыя абяцае не дапусціць пратэстаў падчас УНС : Закон дае нам права ўжываць сілу, спецсродкі і зброю

Міліцыя Мінска заявіла, што гатовая да любых правакацый, якія могуць быць арганізаваны падчас правядзення Усебеларускага народнага сходу.

Створаны аператыўны штаб які будзе адсочваць сітуацыі, служба ідзе ва ўзмоцненым рэжыме.

Пра гэта ў эфіры СТВ распавёў Аляксандр Купчэня, кіраўнік аднаго з падраздзяленняў ГУУС Мінгарвыканкама.

— Усе аб'екты пражывання, наведвання, усе маршруты, па якіх будуць прыбываць дэлегаты, узятыя намі пад кругласутачную ахову. У цэнтральнай частцы горада з сённяшняга дня нясуць службу супрацоўнікі патрульна-паставой службы міліцыі ў складзе парных пешых патрулёў па ахове грамадскага парадку. Акрамя таго, у горадзе Мінску створаны і ўжо пачаў сваю працу Мінскі гарадскі аператыўна-сітуацыйны штаб, ён адсочвае становішча, апрацоўвае і аналізуе ўсю інфармацыю, якая ўжо маецца і якая паступае і будзе паступаць. Міліцыя гатовая да любых выклікаў і пагрозаў. Ахова грамадскага парадку ў сталіцы ў перыяд правядзення гэтага сходу будзе забяспечана, — заявіў Купчэня.

Паводле яго слоў, асабісты склад гатовы "як тэарэтычна, так і практычна": аналізаваліся ўсе варыянты развіцця падзей, праведзены інструктажы, неабходныя заняткі і вучэнні. Арганізаваны спецыяльныя пункты абагравання для сілавікоў. Купчэня таксама нагадаў, што міліцыі «законам дадзена права ўжываць фізічную сілу, спецыяльныя сродкі і зброю ў мэтах, якія прадугледжаны гэтым законам».

Паводле tut.by