Новы дзень — новыя ператрусы. Сілавікі прыйшлі да журналістаў незалежных СМІ і не толькі
Раніца 16 ліпеня распачалася з ператрусаў у журналістаў тэлеканала «Белсат».
Сілавікі прыйшлі да Глеба Лабадзенкі — вядоўцы праграмы «Кожны з нас».
«Ператрус», — Лабадзенка напісаў на сваёй старонцы ў Facebook.
Глеб Лабадзенка распачаў шматлікія культурніцкія праекты, заснаваў курсы вывучэння беларускай мовы «МоваНанова».
Пазней Глеба Лабадзенку сілавікі адпусцілі. «Дзякуй усім, хто хваляваўся. Я дома», — напісаў ён.
З ператрусам прыйшлі і да журналісткі Галіны Абакунчык. Яна таксама паспела паведаміць пра гэта ў Facebook. «За мной прыйшлі», — напісала яна.
Да журналіста «Белсата» Ігара Ільяша прыйшлі сілавікі, паведаміла «Еўрарадыё». Як пазней паведаміў «Белсат», Ігара Ільяша затрымалі ў сувязі з крымінальнымі справамі, але яго статус (сведка ці абвінавачаны) невядомы
Справы паводле артыкулаў «Масавыя беспарадкі» (293 КК РБ) і «Арганізацыя дзеянняў, якія груба парушаюць грамадскі парадак» (342 КК РБ).
Ігара вазілі ў Следчы камітэт. Сілавікі груба абыходзяцца з журналістам, спрабуюць прынізіць, лаюцца.
Увечары 16 ліпеня стала вядома, што Ігара пасля допыту не вызвалілі. Цяпер яго вязуць у ізалятар.
Сваякі журналіста «Белсата» расказалі, што ён трымаецца бадзёра, у добрым фізічным і эмацыйным стане, «упэўнены ў сабе, як заўсёды». Фізічнага гвалту супраць яго не чынілі.
Ігар — муж журналісткі Кацярыны Андрэевай, якую асудзілі за стрым з «Плошчы Перамен» — з акцыі памяці забітага Рамана Бандарэнкі. Ён таксама суаўтар кнігі «Беларусі Данбас», якую улады прызналі «экстрэмісцкай».
Сілавікі звезлі журналіста Ігара Ільяша пасля ператрусу з кватэры, як мяркуецца, на допыт, — гэта паведаміў «Медыязоне» яго сябар.
Прыйшлі з ператрусам да журналіста Яўгена Меркіса з Гомеля. «Ператрус. Папярэдні быў у лютым сёлета. Усё будзе добра!» — напісаў Яўген.
Пасля ператрусу Яўгена затрымалі. Аднак у другой палове дня журналіста выпусцілі са Следчага камітэта. Зараз Яўген на волі, паведамляе БАЖ. Пры ператрусе канфіскавалі тэхніку, 2 ноўтбукі, мабільныя тэлефоны, налепкі.
У гродзенскага журналіста Аляксея Кайрыса таксама ператрус.
Ператрус і ў журналісткі Хрысціны Чарняўскай, якая супрацоўнічае з «Белсатам».
Сілавікі прыйшлі да журналіста Паўла Мажэйкі.
Супрацоўнікі Брэсцкага крымінальнага вышуку прыходзілі ў Пінску да журналіста Віктара Ярашука, піша @belsat. Вядома, што журналіст праходзіць сведкам у межах крымінальнай справы. Міліцыянты забралі кампʼютар і мабільны тэлефон. Віктар Ярашук на волі.
У бацькоў журналіста Алеся Ляўчука з Брэста прайшоў вобшук паводле ч.1 арт 342 за падзеі 13 верасня — «карагодная справа». Вобшук праводзіў ГУБАЗіК, нічога не забралі, адзначае @belsat.
Сілавікі шукаюць кіраўніка гомельскай філіі БАЖ журналіста Міколу Бянько, хоць журналіст з сям'ёй нікуды не хаваецца. Сілавікі прыходзілі ў кватэру родных Міколы, а таксама на ранейшы адрас журналіста. Таксама Міколу тэлефанаваў чалавек, які прадставіўся супрацоўнікам АБЭПа.
Затрымалі былую журналістку «Свабоды» Інэсу Студзінскую, у яе кватэры быў ператрус, паведамляе яе сын, піша БАЖ.
Сілавікі прыйшлі з ператрусам і ў кватэру журналіста «Радыё Свабода» Валянціна Жданко.
У Ганны Галёта раніцай адбыўся ператрус. Яе затрымалі паводле 293 артыкула КК. Ганна Галёта вяла на «Белсаце» праграму-антыфэйк «Лукавыя навіны».
Цяпер адбываецца ператрус і ў фатографа-фрылансера з Гродна Аляксандра Саенкі.
Ператрусы сёння прайшлі таксама ў кватэрах пінскага журналіста Андрэя Якімуша і яго маці. Сам Андрэй цяпер не ў Беларусі, паведамляе БАЖ.
Выломваюць дзверы ў мінскім офісе «Радыё Свабода».
Затрымалі журналіста Алега Груздзіловіча (летась у яго забралі акрэдытацыю «Радыё Свабода»)
«Алега забралі ў кайданах. Было 9 чалавек Забралі ўсю тэхніку», — расказала яго жонка Мар'яна.
Ператрус у журналісткі Любові Лунёвай.
Адбыўся ператрус і ў журналісткі Марыны Харытонавай. Паведамляюць, што сілавікі выламалі дзверы, забралі стары ноўт, камеру, некалькі старых тэлефонаў і банкаўскі карткі.
У кватэры, дзе прапісаная журналістка Марыя Арцыбашава, выламалі дзверы. Яе ў гэты момант у кватэры не было.
Затрымалі журналіста з Івацэвічаў Сяргея Скулаўца. Ранкам да яго дамоў прыехаў мікрааўтобус — і Сяргея забралі, імаверна, супрацоўнікі міліцыі. Апошнія 5 гадзін сувязі з ім няма. Пасля абеду журналіста-фрылансера адпусцілі. Яго дапытваў ГУБАЗіК, забралі ўсю тэхніку.Ператрус адбыўся ў старшыні «Таварыства беларускай мовы» Алены Анісім. Пра гэта яна напісала ў Фэйсбуку: «Пакуль я была на працы, раніцай дома прайшоў вобшук. Мае хлопцы, хвалюючыся за мяне, паведамілі пра гэта падчас абеду. Забралі ноўтбук...»
Ператрус адбыўся і ў гомельскай журналісткі Ларысы Шчыраковай. «Сябры, у мяне сёння быў ператрус і допыт у ГУБАЗіКу. Забралі тэхніку і мабільны тэлефон», — паведаміла яна.
Ператрус ідзе і ў гомельскага журналіста-фрылансера Андрэя Толчына.
У журналісткі Любові Лунёвай прайшлі ператрусы дома і на лецішчы. Цяпер журналістка на волі.