Ператрусы і затрыманні ў дэлегатаў «Схода» (абноўлена)
11 жніўня сілавікі прыйшлі з ператрусамі да дэлегатаў «Схода» — Алены Радаман, Юрыя Пісарчука (Брэст), Уладзіміра Кавалёва, Аляксея Багушэвіча. У Віцебску дэлегата «Схода» Максіма Жукава забралі ў Следчы камітэт, паведамляе «Зеркало».
Ёсць інфармацыя, што сілавікі прыйшлі і да мінчука Івана Бялецкага. Ён таксама з'яўляецца дэлегатам «Схода», а таксама Уладзіміра Мельніка. На сувязь не выходзяць Радзіслаў Фяцісаў, Наталля Абрашына-Жадаева, Арцём Чапель.
Раней былі арыштаваныя дэлегаты Уладзімір Мацкевіч і Сяргей Бародзіч.
UPD. Праваабаронцам вядома, што вобшукі былі таксама ў Алены Патаповіч, Дзяніса Садоўскага, Паўла Якуты, Вольгі Казановіч,
Галіны Каткоўскай, Аляксея Адамовіча, Кацярыны Вургун.
Гэта дэлегаты з розных рэгіёнаў — Мінск, Брэст, Віцебск, Паставы. Яшчэ некалькі
чалавек не выходзяць на сувязь.
Сярод затрыманых — трэнер па трыятлоне Аляксей Адамовіч. У снежні
яму далі 10 сутак, калі ён на ровары вяртаўся дадому.
«Забралі з працы. Прывезлі па месцы прапіскі, зрабілі вобшук
і павезлі ў КДБ. Ён пазваніў мне адтуль, прасіў адваката», — распавяла яго
жонка пра сённяшнія падзеі.
«Вобшукі праводзяць прадстаўнікі КДБ і СК. Пакуль няма
інфармацыі, у чым менавіта абвінавачваюць дэлегатаў. Дваіх адпусцілі пад
падпіску аб неразгалошванні», — расказалі «Нашай Ніве» у прэс-службе «Схода».
Таксама прайшоў ператрус у былога пасла Беларусі ў Славакіі
Ігара Ляшчэні. Раней ён быў старшынёй «Схода», але сышоў і апошнім часам не меў
дачынення да арганізацыі.
«Сход» — гэта віртуальная платформа, дзе можна вылучаць сваіх прадстаўнікоў, а таксама іх абіраць. Плануецца, што прадстаўнікі з усёй краіны — 328 чалавек — змогуць адстойваць інтарэсы сваіх выбаршчыкаў і ўдзельнічаць у Нацыянальным дыялогу. На платформе тэрыторыя краіны разбітая на віртуальныя ўчасткі, якія адпавядаюць адміністрацыйнаму дзяленню Беларусі. Кандыдаты ў дэлегаты запаўняюць анкеты і вылучаюцца ад сваіх участкаў. Галасаванне адбываецца пры дапамозе чат-бота.