Сяргей Чалы аб перспектывах беларускай улады: Нельга перамагчы ўвесь народ, які адмовіў у любові

Вядомы эканаміст — аб новай якасці, у якой сёння знаходзяцца улады.

Каментуючы ў стрыме «Еўрарадыё» апошнія падзеі, эканаміст Сяргей Чалы выказаў меркаванне аб тым, што з нядаўніх часоў не даводзіцца казаць пра беларускія ўлады, як пра адзінае цэлае.

— Падобна на тое, што працуе адразу некалькі розных напрамкаў. Сілавікі вырашаюць адну задачу, МЗС —другую. Па-мойму, усё кіраванне зводзіцца да «хацелак». Раз — хачу самалёт з Пратасевічам. Хачу, каб паказалі зняважанага асабістага ворага. І пляваць на выдаткі, — кажа аналітык.

Працуюць дзве розныя лініі, лічыць Чалы. Адна, якая разумее, што ніякага паслаблення быць не можа, бо абраны курс на эскалацыю гвалту. Гэта значыць, прыкладна тое ж самае, што і першыя тры дні пасля выбараў, толькі ўжо больш маштабна, па ўсёй краіне, а не толькі ў Мінску і вялікіх гарадах.

Пры гэтым, для працягу руху ў гэтым кірунку для Лукашэнкі дастаткова асабістага ўсведамлення таго факту, што «любімая канчаткова падала на развод» і далей застаецца толькі сілавое падаўленне ўсіх нязгодных.

— Другая лінія — выклікаем Макея і гаворым: «А цяпер я хачу, каб пачаўся, як гэта называлася раней, працэс нармалізацыі. Рабіце, што для гэтага трэба». І яны спрабуюць рабіць.

Нармалізацыя сёння, кажа Чалы, гэта перспектыва выхаду на свабоду людзей, якія, калі б не змененыя нядаўна законы, наогул ні ў чым не вінаватыя. Або інтэрв'ю закладніка, які з усмешкай на твары кажа журналістам, як у яго ўсё добра ў СІЗА.

Эксперт не згодны з некаторымі з калегаў, якія выказалі здагадку, што Беларусь апынулася ў сённяшнім становішчы краіны-ізгоя надоўга:

— Так, адбылося тое, чаго так баяўся Лукашэнка. Ён перайшоў тую самую чырвоную лінію, аб якой так шмат казаў. Гэта сапраўды пераход у новую якасць. ( ... ) У гэтых людзей (экспертаў) пачынае складвацца ўражанне, што гэта новы працяглы працэс. Я пакуль ніяк не магу пагадзіцца з гэтым пунктам гледжання. ( ... ) У мяне няма адчування ўстойлівасці таго стану, у які мы перайшлі.

Па словах Чалага, галоўная якасць, у якой сёння знаходзіцца ўлада — немагчымасць дасягнуць пастаўленых мэтаў:

— Нельга перамагчы ўвесь народ, які адмовіў у любові. Немагчыма прыдумаць такую хітрую схему: «А давайце мы будзем кіраваць вечна, але адмовімся ад выбараў». Бо выбары, як вядома, мабілізуюць грамадства. Нельга зрабіць так, што «давайце я пайду, а далей як-небудзь Рада бяспекі без мяне».

Улады сёння знаходзяцца ў падвешаным стане, у сітуацыі, калі нельга адыграць назад, перакананы Чалы.

На думку эксперта, адным з галоўных наступстваў нядаўніх падзей стала развітанне ўлады з ілюзіямі.

— Як кажуць псіхолагі, ты там, дзе твая ўвага. Ён (Лукашэнка) вельмі баяўся апынуцца ў коле палітыкаў-ізгояў. Ён марыў быць нейкім аналагам Пілсудскага. Для яго цяпер крах праекта ўсяго жыцця. Гэта вельмі цяжка, хваравіта. І ён пакуль спраўляецца з гэтым шляхам нагрувашчвання версій аб сусветнай змове супраць яго. Увесь свет супраць яго, усё больш складаныя канструкцыі даводзіцца выбудоўваць, каб захаваць душэўную раўнавагу. І не прызнаць у канчатковым рахунку, што ўсё ён зрабіў сам, пачынаючы з жадання намаляваць сабе 80 працэнтаў 9 жніўня.

Паводле «Салідарнасці».