Светлагорск: Падарункі настаўнікам напярэдадні Міжнароднага дня правоў чалавека
У кнізе «Правы дзіцяці ў навучальным працэсе» адлюстраваны лепшы досвед як айчынных, так і замежных настаўнікаў-практыкаў.
Алена Маслюкова з дапаможнікам “Правы дзіцяці ў навучальным працэсе”
Напярэдадні святкавання 10 снежня чарговай гадавіны прыняцця важнага для чалавецтва дакумента — Усеагульнай дэкларацыі правоў чалавека, у Светлагорску прадстаўнікамі ПЦ “Вясна” была зладжана нетрадыцыйная акцыя.
Падчас пасяджэння раённага метадычнага аб’яднання настаўнікаў гісторыі і грамадазнаўства, праваабаронцы зрабілі настаўнікам каштоўныя падарункі ў выглядзе практычных дапаможнікаў па навучанню правам чалавека.
Дапаможнік “Правы дзіцяці ў навучальным працэсе” ўтрымлівае ў сябе лепшы досвед як айчынных, так і замежных настаўнікаў-практыкаў, мае выдатную метадычную, дыдактычную і нарматыўна-прававую базу. У ім у сціслай, цікавай і даступнай форме распавядаецца пра галоўныя каштоўнасці чалавека, якія павінны паважацца ў любой краіне, на любым кантыненце, ва ўсіх частках свету кожным чалавекам.
Прэзентацыя Дапаможніка “Правы дзіцяці ў навучальным працэсе”
Чаму менавіта такую форму
мерапрыемства абралі праваабаронцы?
"Справа ў тым, — тлумачыць ініцыятар незвычайнай акцыі Алена Маслюкова, — што сучасная беларуская школа такіх падручнікаў не мае, а працэс далучэння беларускіх школьнікаў да агульначалавечых каштоўнасцей у большай ступені адбываецца ў межах школы. Прапагандыстамі і праваднікамі гэтых каштоўнасцей мусяць быць настаўнікі. Дапаможнікі, якія сёння патрапілі ў рукі зацікаўленых настаўнікаў саслужаць і ім, і іх вучням добрую службу ў справе далучэння да правоў чалавека і разумення гэтых правоў”.
Абодва выданні прыйшліся да спадобы настаўнікам. Дарэчы, яшчэ 14 настаўнікаў замовілі для сябе гэтыя дапаможнікі.