Тры надзейныя спосабы падтрымаць «нашаніўцаў» і іншых вязняў «Валадаркі». Падказвае жонка Андрэя Скурко

Колькі народу піша майму Андрэю, а прабіваюцца адзінкавыя лісты. Гэта крыўдна страшэнна, бо па сабе ведаю, колькі душы ўкладваеш у кожную паштоўку, кожны канверт. З якім трымценнем адпраўляеш. Але, дарагія сябры, акрамя лістоў, ёсць яшчэ некалькі спосабаў падтрымаць як нашых Андрэя і Ягора і любога вязня Валадаркі.

Гэта тры спосабы, і яны даволі надзейныя, піша Паліна.

Спосаб першы. Грашовы перавод

Гэта вельмі проста. На пошце вам дадуць запоўніць бланк на грашовы перавод: каму, ад каго, сума. Калі гэты перавод паступае ў СІЗА, то вязню заўсёды даюць распісацца ў квітку. У гэты час ён бачыць прозвішча адпраўніка — ваша прозвішча — і сэрца яго напаўняецца цяплом.

Сума пераводу рэальна няважная, важны знак увагі, прывецік. Не адпраўляйце шмат — 5, 10 рублёў цалкам дастаткова. У СІЗА не так многа нагодаў патраціць грошы, але яны ёсць. Напрыклад, на падпіску або на пакупку масла для бутэрбродаў у турэмнай краме.

Спосаб другі. Тэлеграма

Яны даходзяць нармальна. Адправіць тэлеграму можна па пошце ці па гарадскім тэлефоне 166. На пошце вам трэба папрасіць бланк для тэлеграм і запоўніць: каму, ад каго і сам тэкст. Паверце, 40-60 словаў даюць добры разгон!

Можна пісаць пра што заўгодна. Напрыклад, пра свае навіны. Можна віншаваць з мілымі святамі (сусветны дзень слана). Або з літаратурнай прэміяй імя Францішка Аляхновіча. Можна перадаваць прыветы, любоў і захапленне.

Калі адпраўляць з пошты, тэлеграма каштуе каля 1,5 руб. А па тэлефоне 166 даражэй — каля 6,5 руб. Таксама трэба ўлічваць, што тэлеграма ідзе да вязня некалькі дзён.

Спосаб трэці. Бандэроль або дробны пакет

Мне страшэнна шкада прыгожых паштовак, якія дарагія сябры дасылаюць Андрэю ў лістах, што губляюцца недзе ў сценах «Валадаркі». Таму заклікаю: адпраўляйце лепш дробныя пакеты ці бандэролі! Яны гарантавана даходзяць.

Канечне, паштоўкі ў такім выпадку не падпішаш, яны мусяць быць пустыя — але ж на тое і паштоўка, што карцінка гаворыць лепш за тэкст! А «счытваць» карцінкі вязні добра ўмеюць. Пара паштовак або канвертаў, 50 грамаў арэшкаў або трохі сухафруктаў (не прымаюць толькі ізюм і чарнасліў). Можна пакецікі чаю, рассыпны чай ці каву (але іх трэба перасыпаць з фабрычнай упакоўкі ў звычайны празрысты пакецік).

На «Валадарцы» прымаюць разнастайныя слодычы, цукеркі, шакаладкі (але ў Андрэя, напрыклад, дыябет, то яму хіба дыябетычныя, з невялікім утрыманнем вугляводаў).

Можна дасылаць і нешта яшчэ з ежы ці нейкія мілыя дробязі, прадметы гігіены, калі вам здаецца, што яны вязня парадуюць. Але ёсць нюансы: нешта прымаюць, а нешта не. Такія рэчы адпраўляюць на склад і аддаюць пры вызваленні. А калі гэта недазволеныя прадукты, дык проста знішчаюць. Так, прыкладам, у СІЗА прымаюць, мандарыны, лімоны, але не прымаюць хурму, гранаты. І падобнае.

Бандэроль/дробны пакет у СІЗА можна даслаць з любой пошты. Але важна памятаць тры рэчы:

•  усю ежу, калі яна ва ўпакоўцы, трэба з упакоўкі перакласці ў звычайныя празрыстыя пакецікі;
•  важна, каб цюбікі, бутэлечкі і г.д. (у выпадку прадметаў гігіены) не былі металічнымі;
•  у пакет з бандэролькай трэба ўкласці заяву з пералікам таго, што вы перадаяце. Форма заявы тут. У полі «каму» запаўняеце: Скурко Андрэю Генадзевічу, 1978 года нараджэння ці Марціновічу Ягору Аляксандравічу, 1988 года нараджэння.

Вязням прынясуць вашу бандэроль і вашу заяву, яны павінны будуць распісацца на ёй — і пабачаць ваша прозвішча ды нават выпішуць сабе адрас, каб вас аддзячыць.

На канец: не перастаю захапляцца і дзякаваць усім вам, хто падтрымлівае палітвязняў. Колькі цяпла ад вас! Дзякуючы вам усё перажываецца ў разы лягчэй. Мы непараможныя.

Адрас для грашовых пераводаў, тэлеграм, дробных пакетаў:

220030, Мінск, Валадарскага, 2, СІЗА-1

Скурко Андрэю Генадзевічу

Марціновічу Ягору Аляксандравічу

Спіс палітвязняў, якія знаходзяцца ў СІЗА-1, можна знайсці тут