У Рэчыцы затрымалі ўдзельніка пратэстаў з асяроддзя футбольных заўзятараў
Максіма Ялканава затрымалі на працы 9 сакавіка. Яго папрасілі праехаць для гутаркі да следчага, але на волю ён так і не выйшаў.
29-гадовага жыхара Рэчыцы абвінавачваюць у арганізацыі групавых беспарадкаў, спалучаных з непадпарадкаваннем супрацоўнікам міліцыі (арт. 293 Крымінальнага кодэкса).
Затрыманне Максіма Ялканава праводзілі супрацоўнікі Гомельскага абласнога ўпраўлення ГУБАЗіК. Інфармацыю аб затрыманні пацвердзіў тэлеграм-канал МУС Беларусі. Паводле сілавікоў, Максім Ялканаў у жніўні мінулага года «падчас несанкцыянаваных масавых мерапрыемстваў у Рэчыцы і Гомелі арганізаваў групавыя беспарадкі, спалучаныя з непадпарадкаваннем міліцыянтам».
Таксама паведамляецца, што Максім Ялканаў з’яўляецца прыхільнікам неанацысцкай ідэалогіі. Але, як удалося даведацца «Палескай Вясне» ў знаёмых Максіма, яны ніколі не заўважалі за ім нейкіх паводзін, якія б сведчылі пра яго прыхільнасць да неанацызму.
Максіма Ялканава затрымалі на працы 9 сакавіка. Яго папрасілі праехаць для гутаркі да следчага, але на волю ён так і не выйшаў. Увечары 10 сакавіка з’явілася інфармацыя МУС пра яго затрыманне.
Нягледзячы на тое, што ў пачатку паведамлення МУС Ялканава абвінавачваюць у арганізацыі масавых беспарадкаў (арт. 293 Крымінальнага кодэкса), урэшце міліцыянты пішуць, што ў дачыненні да яго завялі крымінальную справу аб арганізацыі і падрыхтоўцы дзеянняў, якія груба парушаюць грамадскі парадак і спалучаныя з адкрытым непадпарадкаваннем прадстаўнікам улады. Гэтае злачынства прадугледжана арт. 342 Крымінальнага кодэкса. Цяпер Максім Ялканаў зняволены ў ІЧУ ў Гомелі.