United Company папрасіла прабачэння ў Лабадзенкі за рускую мову

Глебу Лабадзенку прыйшоў ліст за подпісам кіраўніка кампаніі Міхаіла Юрковіча.

«Добры дзень, паважаны Глеб Паўлавіч!
Ад імя кампаніі СТАА «Юнайтэд Компані», хочам перапрасіць Вас за высланы супрацоўнікам нашай кампаніі Кулаком В.В. адказ на рускай мове на Вашу заўвагу ў кнізе водгукаў і прапаноў ад 21.08.2016 г., напісаную на беларускай мове. Мы правялі тлумачальную працу з кіраўнікамі сярэдняга звяна і прымем адпаведныя меры па выкананні заканадаўства ў дачыненні да патрабаванняў пісьмовых адказаў на пісьмовыя звароты грамадзян для прадухілення аналагічных выпадкаў у будучыні».
Нагадаем, што ў Глеба Лабадзенкі былі дзве прэтэнзіі да кампаніі.
Першая тычылася таго, што на АЗС пад Стоўбцамі не захацелі пераключаць канал «Россия 24». Пазней Міністэрства інфармацыі патлумачыла, што паводле заканадаўства ў грамадскім месцы можна трансляваць толькі дзевяць каналаў так званага «сацыяльнага пакета»: «Беларусь 1», «Беларусь 2», «Беларусь 3» і г.д. Канала «Россия 24» няма не толькі сярод гэтых дзевяці, але і сярод 209 замежных каналаў, дазволеных для трансляцыі ў Беларусі. Суд па гэтай справе мусіў адбыцца 28 верасня, але яго перанеслі, паколькі напярэдадні пратакол адправілі на дапрацоўку.
Другая прэтэнзія вынікала з першай. Пасля таго, як Глеб на беларускай мове ў кнізе скаргаў і прапаноў апісаў сітуацыю з нежаданнем супрацоўнікаў запраўкі пераключыць канал «Россия 24», яму прыйшоў адказ па-руску. Гэта з’яўляецца парушэннем заканадаўства, за што пагражае штраф ад 4 да 20 базавых велічыняў. Паралельна Глебу прыйшоў адказ з Генеральнай пракуратуры, што гэтая справа перададзеная на разгляд у пракуратуру Мінскай вобласці.

Паводле nn.by