Віктар Бабарыка: Зло — вар'яцкае і недаўгавечнае

«Не здраджваць сабе — самая правільная пазіцыя». Новы каментар Віктара Бабарыкі з-за кратаў пра зло і яго непазбежны фінал.

babaryka_new.jpg

— Што тычыцца таго жаху, у які пагружаны свет паводле капрызу асобных служкаў сусветнага зла і вар'яцтва, дык тут найлепш узгадаць словы Чэрчыля: «Калі вы ідзяце праз пекла, не спыняйцеся!»

Менавіта працягваць жыць ва ўпэўненасці непазбежнай перамогі справядлівасці і не здраджваць сабе — самая правільная пазіцыя.

На працягу тысячагадовай гісторыі чалавецтва яшчэ не было ніводнага прыкладу доўгатэрміновай перамогі вар'яцтва. Нават прыклад Паўночнай Карэі паказвае, што ізаляваныя суветы могуць існаваць доўга ў рамках параўнання з чалавечым жыццём, але яны асуджаныя на заняпад і маргінальнасць. Шлях у нікуды, знікненне з карты свету і паміранне — фінал відавочны. Можна толькі рэгуляваць хуткасць падзення.

Уяўная слабасць дабра вызначаецца толькі кароткатэрміновасцю і цынічнасцю зла. Менавіта з-за немагчымасці выкарыстоўваць гвалт як інструмент, у пэўны момант кароткатэрмінова перамагае нянавісць. Аднак прыходзіць час — і ўсё зноў вяртаецца на свае кругі. Зло разбурае і нявечыць. Яно не здольнае нічога стварыць. Таму недаўгавечнае і вар'яцкае.