Былы палітвязень Ціхан Клюкач адседзеў 30 сутак у карцары за пяць нумароў «Новага Часу»

Былы палітвязень Ціхан Клюкач, які нядаўна вызваліўся пасля адбыцця тэрміну ў калоніі, у інтэрв'ю найстарэйшаму беларускаму выданню (прызнанае «экстрэмісцкім») распавёў, за што атрымаў 30 сутак карцара.

— За што вы трапілі ў ШІЗА у калоніі?

— Пачну з таго, што ШІЗА — тое месца, дзе бывае кожны палітвязень, хтосьці больш, хтосьці менш. На самай справе, можна павесіць чалавеку парушэнне, нават калі гэтага парушэння не было. Проста да цябе падыходзіць прадстаўнік адміністрацыі і кажа: ты са мной не павітаўся, ты не даў даклад або яшчэ нешта не зрабіў. Потым яны пішуць рапарт на парушэнне і закрываюць цябе ў ШІЗА. Гэта можна зрабіць з кожным, нават калі ніякага парушэння не было.

Што тычыцца мяне, то, калі я прыязджаў у калонію, здолеў, нягледзячы на вобшук, пранесці з сабой пяць нумароў газеты «Новы час». Тады я яшчэ не ведаў, што шмат зэкаў ходзяць «пастучаць» у штаб, таму па сваёй нявопытнасці аддаў гэтыя нумары газеты некаторым людзям пачытаць. Пасля гэтага мяне закрылі спачатку на дзесяць сутак, потым яшчэ на дзесяць, а потым і яшчэ на дзесяць. То-бок у калоніі пяць нумароў газеты «Новы час» каштуюць 30 сутак у карцары.

— Якія былі гэтыя 30 сутак?

— Псіхалагічна гэта даволі цяжка. ШІЗА — невялікае памяшканне, у якім нічога няма, і галоўная праблема — тое, што там няма чаго рабіць. Ты проста, па сутнасці, ходзіш цэлыя дні з кута ў кут. Недзе на 19-20 дзень адзіная думка, якая застаецца, — толькі б не звар’яцець.

— Гэта быў адзін з самых цяжкіх момантаў за зняволенне?

— Так.

Інтэрв'ю Ціхана Клюкача «Новаму Часу» можна пачытаць па спасылцы.

https://nashaniva.com/?c=ar&i=288064


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: