Вольга Івашына: Дзяніс не толькі палітвязень, але і ваеннапалонны

Вольга Івашына — жонка гарадзенскага журналіста і палітвязня Дзяніса Івашына — расказала, што яе муж найперш выкрываў агрэсію Расіі супраць Украіны, Грузіі, Сірыі і іншых краінаў. Таму яго можна лічыць цяпер не толькі палітвязнем, але і ваеннапалонным.

Пра гэта Вольга Івашына распавяла ў эфіры «Радыё Рацыя».


— Колькі часу Дзяніс ужо за кратамі?

— Сёння ўжо мінула 357 дзён. І больш за 170 дзён мы не атрымліваем ад яго лістоў.

— Калі вы апошні раз бачыліся з мужам?

— 12 сакавіка 2021 года, калі яго арыштавалі. Дакладней, узялі ў палон. І з гэтага часу я яго не бачыла ні разу. Я ўжо збілася з ліку, колькі разоў я пісала запыты, патрабаванні, каб далі магчымасць убачыць мужа, але следчыя дагэтуль не бачаць падстаў для нашага спаткання.

— Днямі вы звярнуліся да палітыкаў, каб яны паспрыялі вызваленню Дзяніса. Чаму менавіта цяпер?

— Гэта звязана з пачаткам поўнамаштабнага наступу Расіі на Украіну. Нашая тэрыторыя выкарыстоўваецца як плацдарм, і, адпаведна, можна лічыць, што не Беларусь, а рэжым унутранай акупацыі саўдзельнічае ў гэтым. І Дзяніса можна лічыць цяпер не толькі палітвязнем, але і ваеннапалонным.

— Пра яго ў пэўным сэнсе можна сказаць, як пра ваеннага карэспандэнта. Дзяніс, як журналіст,  займаўся няпростымі тэмамі.

— Так, ён займаўся расследаваннямі пра «беркутаўцаў», «вагнераўцаў». І найперш — пра агрэсію Расіі супраць Украіны, Грузіі, Сірыі і іншых краінаў.

— Паступілі ўжо водгукі на ваш заклік?

— Так, пакуль неафіцыйна. Нам аказваюць падтрымку. Пакуль займаемся распаўсюдам і чакаем адказаў. 

«Я прашу вас усіх прыкласці максімальныя намаганні, каб паспрыяць абмену ваеннапалоннага Дзяніса Івашына – сына Беларускага і Украінскага Народаў! Слава Україні!!! Жыве Беларусь!!!» — такімі словамі завяршаецца зварот Вольгі Івашынай да знакавых беларускіх і ўкраінскіх палітыкаў.