«Забралі нават тэлефоны дзяцей». Намеснік старшыні БАЖ распавёў пра ператрус

У намесніка старшыні Беларускай асацыяцыі журналістаў (БАЖ) Барыса Гарэцкага адбыўся ператрус. Ён распавёў TUT.BY, што шукалі і што знайшлі сілавікі.

— Каля 7.30 у дамафон і дзверы сталі настойліва балабоніць. Літаральна праз 10 хвілін я ўбачыў сілавікоў з балгаркай і таранам для дзвярэй і адчыніў дзверы, — распавёў Гарэцкі.

Сілавая група ўварвалася ў кватэру з крыкамі: «Рукі за спіну», але, зразумеўшы,што ў кватэры знаходзяцца трое маленькіх дзяцей, сталі паводзіць сябе цішэй.

Ператрус працягваўся на працягу 3-4 гадзін.

— Глядзелі ўсе шчыліны, у сметніцы, у халадзільніку. Канфіскавалі два ноўтбукі, тэлефоны. Забралі нават тэлефоны дзяцей, — дадаў Гарэцкі.

Ператрус праводзіўся ў межах расследавання крымінальнай справы па арт. 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) КК Беларусі. Сам Гарэцкі не мае ніякага працэсуальна статусу (сведка, падазраваны і т. д.).

Пра тое, што адбываецца ў яго калегі, намесніка праўлення БАЖ Алега Агеева, ён не ведае. Пра ператрус у офісе БАЖ даведаўся ад журналістаў.

Барыс Гарэцкі асабліва падкрэсліў, што БАЖ з'яўляецца афіцыйна зарэгістраваным аб'яднаннем і вядзе сваю дзейнасць празрыста і сумленна.

Нагадаем, раніцай 16 лютага пачаліся ператрусы ў журналістаў і праваабаронцаў па ўсёй краіне. Акрамя таго, праходзяць ператрусы ў офісе БАЖ, пазбаўленага рэгістрацыі праваабарончага цэнтра «Вясна» і незалежнага прафсаюзу РЭП. Як паведамілі ў Следчым камітэце, ператрусы праходзяць «з мэтай высвятлення абставінаў фінансавання пратэстнай дзейнасці».