У цудоўнай Венецыі беларуская мафія пераследуе Джоні Дэпа і Анджаліну Джолі. Вынікі для мафіі будуць несуцяшальнымі.
Карціна Фларыяна фон Данэрсмарка «Турыст» — паўтор французскай стужкі Жэрома Саля «Няўлоўны». Як і ў арыгінале, прыгажуня, закаханая ў махінатара,
спакушае выпадковага чалавека, каб навесці гангстэраў і паліцыю на фальшывы след.
Але ў стужкі Данэрсмарка свае адметнасці. Нямецкі рэжысёр праславіўся суворым фільмам пра Штазі «Жыццё іншых». У «Турысце» Данэрсмарк з радасцю гуляецца ў
таямніцы, сакрэтныя аперацыі і згубныя пасткі, якія выглядаюць зусім не змрочна (у Злучаных Штатах гэты трылер увогуле ўспрымаюць як камедыю).
Другая зачэпка фільма — дуэт слынных галівудскіх акцёраў. Джоні Дэп і Анджаліна Джолі сустрэліся на здымачнай пляцоўцы ўпершыню. Прыгажуня Анджаліна добра адчувае сябе на венецыянскіх
вулачках, а Джоні Дэп з ахайнай дасціпнасцю грае правінцыйнага матэматыка, які трапіў у прыгоды.
Але для беларускай публікі асаблівая нечаканка — беларуская гутарка гангстэраў. Шафападобныя злыдні гавораць па-беларуску без усялякага акцэнту. Магчыма, так яно ад пачатку і сталася ў
Галівудзе. А магчыма, гэта падарунак расійскіх братоў, якія пераагучылі стужку.
У любым выпадку, амерыканскі фільм з французскага арыгіналу — адзіны выпадак, калі можна пачуць беларускую гаворку на кінаэкране.
