Эфект Лукашэнкі? У Іране памілавалі 22 тысячы ўдзельнікаў пратэстаў
Яшчэ нядаўна іх каралі смерцю, а падчас народнага выбуху загінула 530 іранцаў. Што змянілася?
Фота: «Reuters»
Вярхоўны лідар Ірана Алі Хаменеі памілаваў 22 000 чалавек, якія былі арыштаваны падчас нядаўніх антыўрадавых пратэстаў. Пра гэта паведаміла дзяржаўнае інфармацыйнае агенцтва «IRNA», але пацвярджэння гэтай інфармацыі з незалежнай крыніцы пакуль няма, піша «Washington Post».
Як піша выданне, іранскія медыя выказалі здагадку, што памілаванне падпісаў вышэйшы кіраўнік Ірана Алі Хаменеі перад святам Наўруз і пачаткам месяца Рамадан, святога для мусульман. Ён распачнецца 22 сакавіка.
У пачатку лютага «IRNA» таксама паведамляла аб тым, што Алі Хаменеі ў гонар гадавіны ісламскай рэвалюцыі памілаваў «дзясяткі тысяч» зняволеных, у тым ліку асуджаных да турэмнага тэрміну за ўдзел у антыўрадавых выступленнях.
Адметна, што гэтымі днямі з афіцыйным візітам у Іране знаходзіцца Лукашэнка. Да Дня народнага адзінства ён таксама аб'явіў у Беларусі амністыю, праўда, яна не закранула асуджаных па «палітычных артыкулах». Дарэчы, у праграме візіту Лукашэнкі ў Тэгеран значыцца сустрэча з Алі Хаменеі. Ці адбылася яна, пакуль не паведамляецца.
Як перадаюць афіцыйныя крыніцы, галоўнай тэмай перамоў стане «развіццё ўзаемадзеяння па ўсім спектры двухбаковых адносін з акцэнтам на гандлёва-эканамічнае супрацоўніцтва». З прэзідэнтам Ірана Ібрахімам Раісі, з першым віцэ-прэзідэнтам Махамадам Мохерам, старшынёй Сходу ісламскага савета Махамадам-Багерам Галібафам і вярхоўным лідарам Ірана Алі Хаменеі Лукашэнка афіцыйна абмяркуе «рэалізацыю праектаў у сферах прамысловасці, сельскай гаспадаркі, транспарту і лагістыкі». Канешне ж, «асаблівая ўвага будзе нададзена сітуацыі ў рэгіёне і ў свеце агулам», паведаміла прэс-служба.
Толькі вось не вельмі зразумела, якія ў нас могуць быць перасячэнні з гэтай краінай у той самай «гандлёва-эканамічнай сферы». Тым больш што і Іран, і Беларусь знаходзяцца пад санкцыямі.
У верасні мінулага года амністыю для ўдзельнікаў студзеньскай спробы перавароту аб'явіў і прэзідэнт Казахстана Касым-Жамарт Такаеў.
Нагадаем, масавыя пратэсты ў Іране пачаліся пасля таго, як у верасні паліцыя нораваў затрымала 22-гадовую Махсу Аміні за «няправільнае» нашэнне хіджаба (у яе з-пад хусткі былі бачны валасы). Дзяўчына загінула пры нявысветленых абставінах. Па словах сваякоў Аміні, паліцыянты жорстка збілі дзяўчыну. Самі сілавікі сцвярджаюць, што Аміні патрапіла ў лякарню нібыта з-за сардэчнай недастатковасці.
Па даных іранскіх праваабаронцаў, падчас пратэстаў было арыштавана больш за 19 700 чалавек. Сама меней 530 чалавек былі забіты ў выніку жорсткага падаўлення ўладамі дэманстрацый. Частка ўдзельнікаў пратэстаў былі пакараны.