«Голас» супраць выбаркамаў у Баранавічах. Як разыходзіліся па ўчастках дадзеныя па бюлетэнях

На сайце платформы «Голас» апублікаваныя выніковыя лічбы галасавання на прэзідэнцкіх выбарах. Ёсць інфармацыя і па некаторых баранавіцкіх участках. Розніца паміж колькасцю галасоў за Святлану Ціханоўскую паводле звестак участковых камісій і на падставе фатаграфій бюлетэняў, дасланых выбаршчыкамі, уражвае, піша «Intex-press».

Усяго ў Баранавічах было створана 69 участкаў для галасавання. На платформе «Голас» пакуль прадстаўлены вынікі па 24.
Ва ўсіх выпадках дадзеныя аб колькасці галасоў, аддадзеных за Святлану Ціханоўскую, па дадзеных участковых камісій і атрыманых на падставе фота бюлетэняў, адрозніваюцца. Прычым на некаторых участках гэтая розніца ў некалькі галасоў, а на некаторых — у некалькі разоў.
Напрыклад, выбаршчыкі, якія галасавалі на ўчастку № 54 (Баранавіцкі малочны камбінат), даслалі 281 фота бюлетэня, якое пацвярджае свой выбар на карысць Ціханоўскай. У выніковым пратаколе камісіі на карысць яе значыцца 282 галасы. Калі не браць у разлік колькасць галасоў, якія паступілі на платформу без фота, лічбы амаль сыходзяцца. Аднак трэба разумець, што ў дзень галасавання і наступныя тры дні амаль немагчыма было адправіць фота бюлетэня з-за непрацуючага Інтэрнэту.
Адносна невялікая розніца таксама на ўчастку № 42 (інтэрнат Будтрэста № 25), № 45 (інтэрнат каледжа лёгкай прамысловасці ім. Чарнышова).
Па астатніх участках розніца (не на карысць Ціханоўскай) вялікая. Напрыклад, па ўчастку № 56 (ГІМНАЗІЯ № 5) выбаршчыкі даслалі 398 фота бюлетэняў за яе, у камісіі атрымалася 98, гэта значыць у 4 разы менш.
Розніца прыкладна ў тры разы на ўчастках № 26 (СШ № 20), № 9 (СШ № 19).
Прыкладна ў 2,5 разы — на ўчастках № 17 (Баранавіцкае аддзяленне чыгункі), № 22 (Гімназія № 1).
Прыкладна ў два разы — на ўчастках № 12 (СШ № 18), № 19 (Гімназія № 3), № 23 (Гімназія № 1), № 39 (СШ № 9), № 46 (вучэбна-метадычны кабінет), № 47 (СШ № 16), № 50 (СШ № 10).
Нагадаем, платформа «Голас» была створана для прадухілення фальсіфікацый на выбарах. Выбаршчыкам прапаноўвалі сфатаграфаваць свае бюлетэні і адправіць сэрвісу.
Платформу «Голас» не раз блакавалі, а кіраўнік ЦВК Лідзія Ярмошына назвала яе ценявым Цэнтрвыбаркамам, «шкодным і злачынным праектам».

Паводле tut.by