Лябедзька дэманстратыўна пакінуў залю суда

Мінскі гарадскі суд разгледзеў скаргі Алеся Арастовіча, Анатоля Лябедзькі і Уладзіміра Раманоўскага на рашэнне суда Савецкага раёна аб прыцягненні іх да адміністрацыйнай адказнасці – арышту на 10 і 15 сутак з нагоды правядзення перадвыбарчага пікета, прысвечанага праблеме палітычных вязняў. 



Справу намесніка старшыні БСДП (Народная Грамада) Алеся Арастовіча разглядаў сумнавядомы суддзя Камісараў, які ўжо адзначыўся прысудамі на палітычных працэсах. За 15 хвілін рашэнне было прынятае –  ён пакінуў ў сіле пастанову суда Савецкага раёна. 
Пасля гэтага суддзя абвясціў, што надалей разглядае дзве справы старшыні АГП Анатоля Лябедзькі, звязаныя з правядзеннем пікета за адмену аўтапошліны і пікета салідарнасці з палітвязнямі.  
Першае, што зрабіў лідэр АГП – выказаў недавер суддзі, матываваўшы гэта тым, што міжнародныя арганізацыі прынялі шэраг рэзалюцый, у якіх канстатуецца, што ў Беларусі няма незалежнай судовай сістэмы. Гэта азначае, што суд не можа прымаць самастойныя рашэнні. Ён адзначыў, што ўся судовая вертыкаль зараз змагаецца з Аб’яднанай грамадзянскай партыяй, якую ён прадстаўляе, і ўсё судовыя рашэнні палітызаваныя – «суды выносяць палітычныя, а не юрыдычныя рашэнні». Суддзя абвясціў перапынак, каб параіцца. Тым часам Анатоль Лябедзька дэманстратыўна пакінуў залю пасяджэння, фактычна пакінуўшы суддзю сам-насам. 
«Проста агідна глядзець, як гэтыя «чорныя чалавечкі» здзекуюцца з закона, правапрымяняльнай практыкі, з Канстытуцыі. Нават агідна знаходзіцца з імі ў адным памяшканні, – паведаміў ён сайту ucpb.org. –  Таму і выказаў усё ім у твар. Суддзя гэтага не чакаў, але няхай застаецца і сам выносіць рашэнні, якія прымае ў адпаведнасці з тым, што яму кажуць, а не з тым, што дыктуюць Канстытуцыя і законы».
Скарга старшыні Беларускага аддзялення міжнароднага таварыства «Мемарыял» Уладзіміра Раманоўскага таксама была адхілена судом.