Лукашэнка — Пашыняну: чаму ты язык засунуў у адно месца, Пуціна баішся?

Здабыткам галоснасці працягваюць станавіцца фрагменты прэс-канферэнцыі Аляксандра Лукашэнкі для журналістаў расійскіх рэгіёнаў, якая прайшла ў Мінску 14 снежня.

Так апублікаваны ўрывак з мерапрыемства, дзе Лукашэнка распавёў, як ён «будаваў» армянскага в.а. прэм'ера Ніколу Пашыняна.
«Я сказаў яму пры Пуціне: Нікол, давай паставім кропкі над «i». Хто займае першае месца па гандлі зброяй з Азербайджанам? Хто? Расія. А чаго ты язык засунуў у адно месца? Скажы яму, пакрытыкуй Уладзіміра Уладзіміравіча. А, баішся?» — сказаў Лукашэнка.
Кіраўнік беларускай дзяржавы нагадаў армянскаму калегу, што Беларусь, з улікам прададзенага «Паланэза», займае ў гандлі зброяй з Азербайджанам усяго 4-5 месца.
«Паланэзаў» не будзе, будзем дзясятымі. Ну вось што ты нападаеш на Беларусь? Нападаеш на сваіх, каб чужыя зразумелі? Ну ты скажы, і я буду маўчаць», — дадаў ён.
Naviny.by раней пісалі, што Лукашэнка на сустрэчы з журналістамі патлумачыў, чаму прадаў Баку ракетны комплекс залпавага агню «Паланэз».
На думку Пашыняна, продаж Беларуссю зброі Азербайджану скажае сутнасць Арганізацыі дамовы аб калектыўнай бяспецы.
Пашынян 16 лістапада ў гутарцы з журналістамі заявіў, што запатрабуе тлумачэнняў ад Лукашэнкі ў сувязі з абмеркаваннем сітуацыі, якая склалася ў АДКБ з краінай, якая не з'яўляецца членам гэтай арганізацыі, — Азербайджанам.

На гэтую заяву рушыў услед з'едлівы каментар афіцыйнага Мінска. Міністэрства замежных спраў Беларусі лічыць непрымальнымі заявы в.а. прэм'ера.