Лукашэнка зноў абмяркоўваў з Пуціным, адкуль рыхтуецца напад

Аляксандр Лукашэнка сёння на цырымоніі ўшанавання выпускнікоў ваенных ВНУ і вышэйшага афіцэрскага складу падзяліўся некаторымі падрабязнасцямі ўчорашняй размовы з Уладзімірам Пуціным. Аказалася, што ён зноў абмяркоўваў, адкуль рыхтуецца напад.

«У апошні час (і мы гэта падрабязна абмяркоўвалі ўчора з прэзідэнтам Расійскай Федэрацыі) распрацоўваюцца стратэгічныя планы нападу на Расію. І галоўны кірунак ўдару (гісторыя паўтараецца) — праз Украіну і праз Беларусь», — цытуе Лукашэнку reform.by са спасылкай на яго прэс-службу.

Нагадаем, неўзабаве пасля нападу Расіі на Украіну адбылася сустрэча Аляксандра Лукашэнкі і Уладзіміра Пуціна. Падчас гэтай сустрэчы Лукашэнка заявіў, што прывёз Пуціну карты, каб паказаць, «адкуль рыхтаваўся напад». Відэа стала мемам.

Сёння Лукашэнка таксама патрабаваў ад ваенных большага інтэлекту і ведаў і абяцаў ім рост сацыяльнай падтрымкі ўжо з наступнага года. Таксама ён даў характарыстыку ваенна-палітычнай абстаноўцы і зноў папракнуў саюзнікаў па АДКБ у «чакальнай пазіцыі».