Лукашэнку падрыхтавацца: у Расіі падрыхтавалі Пуціну запасны «пераможны» план

У асяроддзі Уладзіміра Пуціна ўжо не вераць у перамогу ў вайне супраць Украіны, таму падрыхтавалі запасны «пераможны» план. Гэты план заключаецца ў анэксіі Беларусі.


Пра гэта, спасылаючыся на крыніцы ва ўкраінскай вайсковай выведцы, распавёў шэф-рэдактар украінскага выдання Obozrevatel Арэст Сохар у сваім Telegram-канале «Арэстакратыя». «Лукашэнку варта занепакоіцца», — адзначыў ён.

Як адзначае журналіст, расійскія «Гіены перамогі» на чале з сакратаром Рады бяспекі Расіі Мікалаем Патрушавым задумалі ўключыць Беларусь у склад Расіі. Сутнасць іх плана складаецца ў тым, што расійскія спецслужбы пад сцягам Украіны правядуць у Мінску спробу дзяржаўнага перавароту.

«Легенда ўжо ёсць: украінскія "нацысты" сумесна з беларускай "агентурай" хочуць выкарыстоўваць Беларусь як новы плацдарм для вайны з Расіяй. "Доблесная" расейская армія разам з вернымі ёй войскамі бульбашоў знішчаюць "неанацысцкіх наймітаў" і ратуюць народ Беларусі ад прыгнёту "неанацыстамі" і NATO», — мяркуе Сохар.

У выніку ўзнікнуць «спадарожныя страты» ў выглядзе фізічнай ліквідацыі Аляксандра Лукашэнкі нібыта ўкраінскай дыверсійнай групай.

На чале Беларусі замест Лукашэнкі будзе пастаўлены лаяльны Маскве фігурант, напрыклад, сакратар Савета бяспекі Аляксандр Вальфовіч. Ён павінен зачысціць рэшткі нелаяльных да Расіі элементаў і правесці рэферэндум Расіі, як гэта было ў Крыме.

«Гэты план ужо запушчаны ў рэалізацыю. Кіраўніка МЗС Рэспублікі Макея, які быў кантактам Лукашэнкі на Захадзе, адправілі на той свет. Цяпер вывучаецца рэакцыя Лукашэнкі на апошнія падзеі. Будзе супраціўляцца — сцэнар паскораць», — напісаў шэф-рэдактар украінскага выдання.

Паводле яго слоў, усё гэта дасць Расіі добры мабілізацыйны рэсурс і плацдарм для магчымага наступу на Украіну з поўначы — Лукашэнка пакуль не дае «ходу» такому сцэнару.

Акрамя таго, кіраўніцтва РФ атрымае «перамогу», якую можна будзе «скарміць» расійскім абывацелям перад выбарамі 2024 года. Анэксія Беларусі дасць пуцінскаму рэжыму пэўную падтрымку і перакрые паразу ва Украіне, як і ў выпадку з Крымам.

Масква атрымае магчымасць выйсці з вайны, «захаваўшы ботакс на твары Пуціна», дадаў Арэст Сохар. Так, атрымаўшы Беларусь, РФ зможа гандлявацца з Захадам адносна вываду войскаў з часткі тэрыторыі Украіны (без Крыма) у абмен на мір і прызнанне анэксіі.

«Расійскім "турбапатрыётам" растлумачаць, што ўсе мэты спецаперацыі дасягнутыя, расійцы выратаваныя ад падступнага NATO. Усё прыгожа на паперы, але мы ўжо ведаем, як лёгка ламаюцца гэтыя планы. Лукашэнка хоць і загнаны пацук, але хітры і прадбачлівы. А для нас гэтая гісторыя важная, бо паказвае: нават Пуцін і яго чэлядзь ужо ўсвядомілі непазбежнасць сваёй паразы, а таму спешна шукаюць запасныя шляхі адступлення», — піша шэф-рэдактар Obozrevatel.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: