Святлана Ціханоўская: Голас беларусаў будзе гучаць у Радзе Еўропы

Рада Еўропы прыняла рашэнне пра стварэнне кантактнай групы па супрацоўніцтве з беларускім грамадствам. Такім чынам, Рада Еўропы падтрымала прапанову Святланы Ціханоўскай, якую яна агучыла падчас сустрэч з генеральным сакратаром РЕ і выступлення перад ПАРЕ.

Святлана Ціханоўская і генеральны сакратар Рады Еўропы Марыя Пейчыновіч-Бурыч

Святлана Ціханоўская і генеральны сакратар Рады Еўропы Марыя Пейчыновіч-Бурыч

Голас беларусаў будзе гучаць у Радзе Еўропы, паведаміла Святлана Ціханоўская і адзначыла, што цяпер у Радзе Еўропы з'явілася беларуская кантактная група.

Святлана Ціханоўская «вельмі ўсцешаная», што Рада Еўропы «вырашыла прыняць маю прапанову наконт стварэння кантактнай групы па супрацоўніцтве з беларускімі дэмакратычнымі сіламі і грамадзянскай супольнасцю. Гэта яшчэ адзін важны крок да вяртання беларусаў на міжнародную арэну», — напісала яна ў твітары.

Ціханоўская адзначыла, што раней Рада Еўропы «адмовілася ад кантактаў з прадстаўнікамі нелегітымнага рэжыму на карысць дэмакратычных сіл і грамадзянскай супольнасці. Гэта выразны сігнал беларусам, што Рада Еўропы не прызнае рэжым Лукашэнкі». І адначасова Рада Еўропы мае намер супрацоўнічаць з прадстаўнікамі дэмакратычнага руху ў інтарэсах усяго беларускага народа.


Плануецца, што беларуская кантактная група будзе дапамагаць Радзе Еўропы ў выпрацоўцы пазіцыі па Беларусі, а таксама зможа каардынаваць і рэалізоўваць праекты ў рамках розных праграм Рады Еўропы, рыхтаваць праекты рэформ і дэмакратычных пераўтварэнняў для новай Беларусі.

У кантактную групу ўвойдуць прадстаўнікі структур Рады Еўропы, грамадзянскай супольнасці і дэмакратычных сіл. Склад кантактнай групы будзе яшчэ абмяркоўвацца.