Святлана Ціханоўская ў эфіры «Эхо Москвы»: пакуль баюся ехаць у Расію, бо беларусаў экстрадуюць вельмі лёгка

Святлана Ціханоўская ў інтэрв'ю радыёстанцыі «Эхо Москвы» паразважала пра плён заходніх санкцый у дачыненні да Лукашэнкі і яго атачэння, а таксама ацаніла перспектывы дыялога ўлады і апазіцыі. Некаторыя тэзісы інтэрв'ю прыводзіць «Свабода».

Пра рэвалюцыю

Святлана Ціханоўская ў інтэрв'ю «Эхо Москвы» выступіла супраць рэвалюцыйнай змены ўлады ў краіне:

«Я супраць такога сцэнара, я яго не падтрымліваю. Мабыць, ува мне гаворыць жанчына, у першую чаргу. І я разумею, што пры такіх падзеях ахвяры непазбежныя, шматлікія ахвяры, асабліва калі рэжым Лукашэнкі гатовы страляць. А мы ведаем, што яны гатовы забіваць людзей. Таму я не хацела б ахвяраваць беларусамі ў такім захопе».

Пра санкцыі

«Санкцыі маглі б мець нашмат большы эфект, калі б прадстаўнікі рэжыму не маглі прыехаць у Расію і ўзяць крэдыты. А яны могуць. Таму давайце задамо пытанне прадстаўнікам Крамля: ці вартае яно таго?» — сказала Святлана Ціханоўская.

З яе пункту гледжання, новы чалавек ва ўладзе на аснове ўзаемавыгаднай і адкрытай пазіцыі толькі палепшыць гандлёвыя, эканамічныя адносіны Беларусі з Расіяй. «Чаму ў Маскве думаюць, што пасля Лукашэнкі ўсё будзе кепска?» — перапытала яна.

Пра Пуціна

Таксама Святлана Ціханоўская паразважала, ці можа прэзідэнт Расіі Уладзімір Пуцін стаць мадэратарам размовы паміж ёй і Лукашэнкам або яго прадстаўніком.

«Вядома, можа, як і прадстаўнікі іншых краін. Дзеля таго, каб дамоўленасці, якія будуць выказаныя на перамовах падчас дыялога, усімі прымаліся і былі, прадстаўнікі іншых краін, якія гэта фіксуюць, каб далей не ўзнікала пытанняў».

Пра Расію

Сама Святлана Ціханоўская ў адказ на пытанне, ці баіцца яна прыязджаць у Расію, адказала, што так.

«Пакуль што баюся, бо была там аб’яўленая ў вышук. Вядома, пагроза арышту застаецца — беларусаў, якія выехалі на тэрыторыю Расіі, экстрадуюць вельмі лёгка».

Пра памылкі

Журналісты «Эхо Москвы» таксама пацікавіліся, ці можна было зрабіць штосьці інакш падчас пратэстаў пасля леташніх прэзідэнцкіх выбараў.

«Напэўна, па-іншаму было нельга. Мы рабілі, не хачу казаць слова "рэвалюцыя", але так і ёсць, зыходзячы з бягучых падзей. Адзінае, чаго недаацанілі ў той момант, — гэта неадэкватнасць улады. Я, слова гонару, была ўпэўненая: так званая ўлада ўбачыць сотні тысяч людзей на вуліцах і зразумее, што час ужо весці дыялог з беларусамі, а не ўтрымліваць уладу сілай. Прымаць рашэнні для людзей, а не для аднаго чалавека».

Пра новыя выбары

Святлана Ціханоўская заявіла, што не плануе больш балатавацца на прэзідэнцкіх выбарах — найперш таму, што не мае палітычных амбіцый. На яе перакананне, шмат вартых людзей, якія здольныя ўзяць на сябе кіраўніцтва краінай.