У Мінск прыляціць Пуцін. Кіраўніку РФ патрэбны геапалітычны прарыў коштам Беларусі?

У Мінск 19 снежня прыляціць прэзідэнт Расіі Уладзімір Пуцін. «Вынік візіту павінен быць гучным і пафасным», лічыць Павел Усаў.

Пра візіт Пуціна паведамляюць беларускія праўладныя рэсурсы. 19 снежня адбудуцца перамовы ў пашыраным складзе з удзелам беларускага ўрада.

Таксама запланавана і сустрэча Пуціна з Лукашэнкам у фармаце адзін на адзін. Адзначаецца, што прыярытэтная ўвага будзе нададзена пытанням бяспекі. Анансавана, што пасля гэтага кіраўнікі Расіі і Беларусі зробяць заяву для прэсы.

Палітолаг Павел Усаў у сваім тэлеграм-канале назваў гэты візіт Пуціна надзвычай небяспечным для Беларусі.

«19 снежня Пуцін верагодна прыедзе ў Мінск. Бачу толькі 2 мэты гэтага візіту:

1. Канчатковае прыцісканне (скаардынаванне) Лукашэнкі ў справе ўступлення ў вайну.

2. Рэалізацыя палітычнага і вайсковага вымярэння «інтэграцыі» Беларусі. Магчыма, гаворка пойдзе пра больш цэнтралізаваныя органы палітычнага кіравання «саюзам».

Без сумневаў, Пуціну патрэбны геапалітычны прарыў, і гэты прарыў будзе зроблены коштам Беларусі.

Пуціну патрэбны вынік, калі паехаць у Мінск і не прывезці рэальны вынік (вайну і Беларусь), гэта будзе даволі адчувальным паражэннем для Крамля.

Вынік візіту павінен быць гучным і пафасным».