Аляксандра Герасіменя: Калі спартоўцы звязаны з падтрымкай рэжыму, ім не месца на Алімпіядзе
Экс-кіраўніца Беларускага фонду спартыўнай салідарнасці і трохразовая медалістка Алімпіяд Аляксандра Герасіменя напісала адмысловую калонку ў «Л*стэрка», дзе разважае над ідэяй МАК па допуску спартоўцаў з Беларусі і Расіі ў нейтральным статусе на Алімпіяду-2024.
Наогул цікава, як у Міжнародным алімпійскім камітэце (МАК) трактуюць Алімпійскую хартыю. Яны шмат гавораць пра роўнасць, справядлівасць. Кожны, маўляў, мае магчымасць трэніравацца і выступаць. Але ж гэта не адпавядае рэчаіснасці! Мы ведаем пра разбурэнне спартыўных аб’ектаў ва Украіне, не кажучы пра тое, што частка спартоўцаў пайшла ваяваць. Якія тут трэніроўкі?
МАК спрабуе ўбудаваць «роўнасць» у цяперашнія рэаліі. Як Еўропа спачатку рэагавала на расійскую агрэсію? Мы, здаецца, за мір, але падтрымліваць Украіну не будзем — нападнік усё роўна пераможа. Навошта ўмешвацца, псаваць адносіны? Чым далей, тым страшнейшыя здзяйсняліся злачынствы. Толькі праз пэўны час да Украіны пачалі ставіцца больш лаяльна. Але якой цаной? Гэта гульня лёсамі людзей дзеля сваёй выгады. Жаданне застацца ўбаку. І цяпер я бачу такую ж маладушнасць, падмену паняццяў. Мы ж «толькі» спартоўцы і за мір ва ўсім свеце.
Лічу, праблема МАК — у наяўнасці шаблонаў. Патлумачу, што маю на ўвазе. У Фонду спартыўнай салідарнасці былі выпадкі камунікацыі з міжнароднымі арганізацыямі пасля выбараў у Беларусі ў 2020-м. Але яны — закладнікі прынятых правіл. Ніхто не будзе выходзіць за рамкі паўнамоцтваў. А тое, што некаторыя нормы даўно састарэлі, нікога не хвалюе.
Разумею, што тым ці іншым чынам спартоўцы з краін з дыктатарскімі рэжымамі могуць сутыкацца з парушэннем правоў. Але калі вы «міжнародны» камітэт, то ўключайцеся, разбірайцеся! З сучаснымі тэхналогіямі ўсё навідавоку.
Затое МАК, напэўна, хвалюе рэпутацыя, грамадская думка. Успомніце былога кіраўніка Міжнароднай федэрацыі хакея Рэнэ Фазеля. Ён прыязджаў у Мінск, абдымаўся з Лукашэнкам. Але грамадскасць, спонсары, розныя кампаніі абурыліся — і Мінск пазбавілі чэмпіянату свету. Тое самае можа адбыцца і цяпер.
У Беларусі і Расіі ёсць годныя спартоўцы, якія маглі б выступіць на Алімпіядзе. Яны асуджалі вайну. Але пакуль вельмі размытыя крытэрыі допуску. З іншага боку, не разумею, як на практыцы будуць вызначаць, ці актыўна той або іншы спартовец падтрымліваў баявыя дзеянні. Прычым там не адзін дзясятак атлетаў — гаворка пра сотні. Яны ніколі адкрыта не скажуць, што супраць вайны і рэжыму — іх проста здымуць са стаўкі і пазбавяць заробку.
А так, думаю, беларусы без праблем выступяць на Алімпіядзе, калі ім дадуць такую магчымасць. Мы ж бачым, як паводзіць сябе большасць — сядзяць ціха і не высоўваюцца. У іх не ўзнікне ніякіх маральных дылем падчас суперніцтва з украінцамі. Пра расіян я наогул маўчу — абы дапусцілі.
Вядома, гэта будзе непрыемна. Несправядліва. Але выхад — толькі байкот. Такой імавернасці з боку краін, якія актыўна падтрымліваюць Украіну, я таксама не выключаю. Калі ім удасца сфарміраваць магутную кааліцыю, то сваім магчымым непрыездам яны вымусяць МАК адмовіцца ад ідэі запрашэння беларусаў і расіян.
Ведаеце, мяне нядаўна спыталі, ці нармальна, што беларусы не радуюцца перамогам сваіх спартоўцаў. Вядома! З 2020-га ў краіне не працуе закон: адны беларусы збівалі іншых, катавалі. Таму што ёсць людзі і нелюдзі. І калі спартоўцы былі неяк звязаны з падтрымкай рэжыму, то ім проста не месца на Алімпіядзе. Хай і пад нейтральным сцягам.
Аляксандра Герасіменя — срэбная прызёрка Алімпіяды 2012 года на дыстанцыях 50 і 100 метраў вольным стылем. Бронзавая прызёрка Алімпіяды-2016 (50 м вольным стылем). Цяпер вучыць плаванню і праводзіць індывідуальныя трэніроўкі ў Варшаве.