Байдэн засцерагае штаты ад спроб арыштаваць жанчын, якія падарожнічаюць для абортаў

Прэзідэнт Джо Байдэн прадказаў у пятніцу, што некаторыя штаты ЗША будуць спрабаваць арыштаваць жанчын за тое, што яны перасеклі мяжу штата, каб зрабіць аборт — пасля таго, як Вярхоўны суд ЗША адмяніў канстытуцыйнае права на працэдуры па ўсёй краіне, паведамляе «Reuters».

Прэзідэнт ЗША Джо Байдэн

Прэзідэнт ЗША Джо Байдэн


Трынаццаць штатаў, узначаленых рэспубліканцамі, забаранілі або строга абмежавалі працэдуру ў адпаведнасці з так званымі «трыгернымі законамі» пасля таго, як на мінулым тыдні суд адмяніў знакавае рашэнне 1973 года па справе «Роў супраць Уэйда». Жанчынам у тых штатах, якія хочуць зрабіць аборт, магчыма, давядзецца ехаць у штаты, дзе гэта застаецца законным.

Склікаўшы ў пятніцу віртуальную сустрэчу па правах на аборты з губернатарамі штатаў-дэмакратаў, прэзідэнт ЗША Джо Байдэн сказаў, што, на яго думку, «людзі будуць шакаваныя, калі першы штат ... паспрабуе арыштаваць жанчыну за перасячэнне мяжы штата для атрымання медыцынскіх паслуг».

Ён дадаў: «І я не думаю, што людзі вераць, што гэта адбудзецца. Але гэта адбудзецца, і гэта дасць зразумець усёй краіне, што сітуацыя [з абортамі] выходзіць за ўсе магчымыя межы; я маю на ўвазе, яна закранае ўсе вашы асноўныя правы».

Байдэн заявіў, што федэральны ўрад будзе дзейнічаць для абароны жанчын, якія павінны перасячы мяжу штата, каб зрабіць аборт, і забяспечыць ім доступ да лекаў у штатах, дзе яны забароненыя.

Губернатарка Нью-Мексіка Мішэль Лухан Грышэм заявіла на сустрэчы, што яе штат «не будзе супрацоўнічаць» з любымі спробамі адшукаць жанчын, якія рабілі аборты, каб пакараць іх. «Мы не будзем выдаваць», — сказала яна.

Групы па абароне правоў на аборты ў многіх штатах прынялі заканадаўства, накіраванае на захаванне магчымасці жанчын перарываць цяжарнасць.

Нагадаем, 24 чэрвеня Вярхоўны суд ЗША адмяніў рашэнне па прэцэдэнце «Роў супраць Уэйда» 1973 года, пасля якога былі легалізаваныя аборты ў ЗША. Пасля таго, як рашэнне Вярхоўнага суда аб адмене права на аборты было прынята, у Вашынгтоне, а таксама ў цэнтрах гарадоў, на гарадскіх плошчах і парках па ўсёй тэрыторыі Злучаных Штатаў пачаліся пратэсты.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: