Луіджы Манджоне — новы Робін Гуд? Дасье ў карыкатурах

ЗША захліснула цунамі салідарнасці з Луіджы Манджоне — меркаваным забойцам гендырэктара адной са страхавых кампаній ЗША. Карыкатурысты таксама сачылі за сітуацыяй.  

4 снежня ў Нью-Ёрку застрэлілі генеральнага дырэктара адной з самых буйных у ЗША медыцынскіх страхавых кампаній UnitedHealthcare 50-гадовага Браяна Томпсана. Адразу рэакцыя грамадства на забойства была супярэчлівай з-за таго, што мадэль страхавой медыцыны вельмі непапулярная. 

Прыстойная страхоўка для амерыканскай сям'і каштуе вялізных грошай. Пры гэтым страхавыя кампаніі часта ўразаюць планы пакрыцця страхоўкі, адмаўляючы кліентам у фінансаванні лячэння. На гэты конт ёсць у тым ліку шмат карыкатур. Напрыклад, на гэтай відаць, што страхавальнікі не даюць лекарам наўпрост лячыць хворых.

Неўзабаве аказалася, што забойства мела палітычны падтэкст. Па падазрэнні ў забойстве топ-менеджара затрымалі 26-гадовага Луіджы Манджоне. Пры ім таксама знайшлі маніфест, у якім індустрыя медыцынскага страхавання называлася «паразітамі». Гэты факт выклікаў спачуванне да забойцы. Дадатковы фактар: Луіджы — выхадзец з багатай сям'і, у якой шмат нерухомасці. Сам ён атрымаў ступені бакалаўра і магістра камп'ютарных і інфармацыйных навук. Тут жа з'явіліся першыя карцінкі, на якіх ён быў намаляваны як Робін Гуд.

Таксама многія ўспомнілі пра персанажа Луіджы з вядомай камп’ютарнай гульні пра Марыё. Луіджы адразу пачалі адлюстроўваць як камп’ютарнага персанажа. Напрыклад, на гэтым малюнку Луіджы забівае гендырэктара страхавой кампаніі, які выяўлены монстрам.

Аналізуючы феномен папулярнасці Луіджы Манджоне, эксперты кажуць, што вялікую ролю ў яго фармаванні мела  вонкавае падабенства юнака на станоўчых кінагерояў. Сапраўды, на шматлікіх фотажабах Луіджы выглядае як галівудскі супергерой. Напрыклад, тут ён вельмі падобны на героя сагі пра Бэтмэна.

Культ Луіджы дайшоў да такіх маштабаў, што з'явіліся выявы мужчыны ў выглядзе святога — патрона справядлівай медыцынскай сістэмы.

Нарэшце, многія аспрэчылі рашэнне рэдакцыі папулярнага часопіса The Time прысудзіць тытул чалавек года Дональду Трампу. На іх думку, галоўным героем 2024-га стаў Луіджы Манджоне. Так ці інакш, з рэакцыі грамадства на забойства кіраўніка адной з найбуйных страхавых кампаній ясна адно: гнеў амерыканцаў з нагоды сістэмы страхавання і аховы здароўя дасягнуў кропкі кіпення.