«Сітуацыя крытычная». Прэм’ер Славакіі Фіца прыйшоў у прытомнасць пасля замаху

Прэзідэнт Славакіі Петэр Пелегрыні распавёў, што яму ўдалося перагаварыць у бальніцы з параненым напярэдадні прэм'ерам краіны Робертам Фіца. Аднак, паводле яго слоў, гэта не азначае, што небяспека абмінула і жыццё прэм'ера ўдалося выратаваць. Стан Фіца па-ранейшаму застаецца «неверагодна цяжкім», і пасля замаху ён «быў на валасок ад смерці».

Калі б выпушчаныя нападнікам кулі прайшлі літаральна на некалькі міліметраў правей або лявей, у параненага б не было ніякіх шанцаў, перадае словы Пелегрыні BBC.

«Ён можа гаварыць, але [вымавіў] літаральна некалькі сказаў, і вельмі, вельмі стаміўся... Сітуацыя вельмі крытычная», — сказаў Пелегрыні журналістам, якія сабраліся ля ўваходу ў бальніцу.

Прэзідэнт запэўніў, што ўрачы працягнуць змагацца за жыццё прэм'ера, але высновы аб тым, наколькі паспяховыя гэтыя спробы, можна будзе зрабіць толькі праз некалькі дзён.

У сувязі з гэтым абавязкі і паўнамоцтвы кіраўніка ўрада краіны часова ўскладзеныя на двух віцэ-прэм'ераў.

Распавёўшы апошнія навіны пра стан Фіца, Пелегрыні заклікаў палітычныя партыі краіны прыпыніць ці нават цалкам згарнуць падрыхтоўку да маючых адбыцца выбараў у Еўрапарламент, якія пройдуць з 6 па 9 чэрвеня.

«Калі нешта народу Славакіі сёння і трэба, дык гэта хаця б базавая згода і адзінства славацкага палітычнага прадстаўніцтва, — патлумачыў сваю просьбу Пелегрыні. — Можа, і не кансенсус, але, калі ласка, хоць бы паміж сабой дыскусіі трэба весці цывілізавана».

Прэм'ер-міністр Славакіі Фіца паранены ў выніку замаху

Да прысутных ля будынка бальніцы рэпарцёрам звярнуўся таксама міністр унутраных спраў Славакіі Матуш Шутай Эштак.

Назваўшы затрыманага за напад на прэм'ера мужчыну «ваўком-адзіночкай», які не належыць ні да якіх палітычных груп, кіраўнік МУС тым не менш папрасіў журналістаў і астатніх работнікаў СМІ «асобна падумаць» над тым, як яны асвятлялі палітыку ўрада краіны.

Фігура Роберта Фіца з'яўляецца вельмі неадназначнай як у самой Славакіі, так і за яе межамі.

Яго вяртанне да ўлады ў мінулым годзе (з 2018 па 2020 год ён ужо ўзначальваў урад краіны) выклікала ў іншых краін-членаў Еўрапейскага саюза і НАТО асцярогі, што цяпер Славакія адмовіцца ад свайго празаходняга курсу — асабліва ў тым, што тычыцца падтрымкі Украіны ў барацьбе з расійскім уварваннем.

У пачатку вайны Славакія была адным з самых заўзятых прыхільнікаў Украіны, але пасля перамогі на выбарах Фіца, якога шмат хто называе сябрам расійскага прэзідэнта Уладзіміра Пуціна, спыніў пастаўкі Кіеву зброі для патрэб УСУ.