Украіна не будзе выконваць Мінскія пагадненні на ўмовах Масквы

Кіеў не адмаўляецца ад выканання Мінскіх пагадненняў, але выключае прамы дыялог з самаабвешчанымі "ДНР" і "ЛНР". Пра гэта заявіў кіраўнік МЗС Украіны Дзмітрый Кулеба, паведамляе www.dw.com.

Украіна не мае намер выконваць Мінскія пагадненні на ўмовах Расіі. Кіеў не адмаўляецца ад выканання дамоўленасцяў, але выключае прамы дыялог з самаабвешчанай "Данецкай і Луганскай народнымі рэспублікамі", заявіў міністр замежных спраў Украіны Дзмітрый Кулеба падчас брыфінгу. "Гэта наша прынцыповая пазіцыя", — падкрэсліў ён.

Пры гэтым украінскі міністр звярнуў увагу на наяўнасць "сапраўдных шанцаў дыпламатычнага вырашэння" канфлікту вакол Украіны. "Сітуацыя застаецца напружанай, але кантралюемай", — адзначыў Кулеба.

У краін-удзельніц "нармандскага фармату" — Германіі, Францыі, Расіі і Украіны — існуюць рознагалоссі па шэрагу пытанняў, звязаных з выкананнем Мінскіх пагадненняў. Дарадцы лідараў краін "нармандскай чацвёркі" 10 лютага правядуць чарговыя перамовы ў Берліне.