Зяленскі паабяцаў вакцынаваным украінцам ад 60 гадоў бясплатны смартфон з ільготным тарыфам

Прэзідэнт Украіны Уладзімер Зяленскі паведаміў, што вакцынаваныя грамадзяне ва ўзросце ад 60 гадоў змогуць атрымаць бясплатны смартфон з ільготным тарыфам.

Анансаваную Зяленскім праграму «єСмартфон» павінны запусціць вясной 2022 года, удакладняе Hromadske. «Перавагі лічбавай дзяржавы павінны быць даступныя ўсім незалежна ад узросту», — сказаў Зяленскі.

Як адзначыў Зяленскі, атрымаць бясплатны смартфон і ільготны тарыф змогуць усе ахвочыя вакцынаваныя ўкраінцы ад 60 гадоў. Чакаецца, што прыняць удзел у праграме змогуць 8,5 мільёна ўкраінцаў.

Пакуль невядома, як падаць заяўку на ўдзел у праграме, якія менавіта смартфоны будуць уручаць вакцынаваным грамадзянам і што прадугледжвае ільготны тарыф.

Паводле інфармацыі міністра лічбавай трансфармацыі Украіны Міхаіла Фёдарава, першы этап праекта пачнецца ў красавіку: улады пачнуць складаць спіс ахвочых атрымаць смартфон.

Пачатак другога этапу — атрыманне смартфонаў — будзе залежаць ад тэрмінаў вырабу гаджэтаў. Паводле інфармацыі Фёдарава, урад плануе рэалізаваць большую частку праекту ў 2022 годзе.

У лістападзе 2021 года Зяленскі паабяцаў, што грамадзянам Украіны, якія атрымалі два кампаненты вакцыны ад каронавірусу, дзяржава выплаціць па тысячы грыўняў (каля $38).

«На гэтыя сродкі можна будзе набыць абанемент у спартзал або фітнэс-клуб, наведаць кінатэатр, тэатр, музей, канцэртную залю або выставачны цэнтр. Або купіць білеты для падарожжаў унутры краіны, на ўнутраныя авія- і чыгуначныя перавозкі», — казаў Зяленскі.

Украінцы запусцілі флэшмоб з заклікам набываць за «тысячу Зяленскага» кнігі.