Санкцыі заблакавалі экспарт Беларусі на 16-18 млрд долараў

Прэм'ер-міністр Беларусі Раман Галоўчанка агучыў аб'ём заблакаванага экспарту ў ЕС і Паўночную Амерыку — гэта каля 16-18 млрд долараў за год. Пра гэта кіраўнік урада распавёў у інтэрв'ю тэлеканалу "Аль-Арабія".

«Праз санкцыі аказаўся заблакаваны практычна ўвесь экспарт Беларусі ў краіны Еўрапейскага саюза і Паўночнай Амерыкі. Гэта сума, якая ўмоўна раўняецца ў год 16-18 млрд долараў. Натуральна, мы не можам страціць гэты аб'ём экспарту і мусім яго пераарыентаваць на іншыя рынкі. Гэта тое, над чым мы цяпер працуем. Але мы бачым, што ў свеце адбываюцца і адваротныя працэсы, адваротны бок санкцый — гэта праблемы з харчаваннем, з угнаеннямі, з ростам цэн на энерганосьбіты, гэта інфляцыі. Санкцыі разгойдваюць усю сусветную эканоміку», — лічыць Галоўчанка.
Ён назваў санкцыі інструментам гібрыднай агрэсіі. Яны, паводле версіі беларускага прэм'ера, папярэднічаюць «класічнай узброенай агрэсіі». Пра прычыны ўвядзення санкцый беларускі чыноўнік палічыў за лепшае не ўзгадваць.
Нагадаем, у 2021 годзе Беларусь экспартавала тавараў і паслуг на суму 49 257,4 млн. долараў.
reform.by