Стаўкі растуць, але беларусы працягваюць выносіць з банкаў валютныя ўклады

У ліпені 2021 года беларусы абнавілі мінімум аб'ёму валютных укладаў у банках. Нягледзячы на рост ставак па валютных укладах у ліпені, людзі лічаць за лепшае захоўваць грошы не ў банках, адзначае Myfin.by.

Акрамя панічных настрояў праз магчымасць валютных абмежаванняў, сваю ролю адыграў сезон адпачынкаў і выдаткаванне валютных зберажэнняў. У ліпені з банкаў забралі больш за 131 мільён долараў, а агульны аб'ём валютных укладаў у беларускіх банках абнавіў мінімум дзесяцігоддзя і складае цяпер $5,13 млрд.

Паводле звестак Нацбанка, у ліпені 2021 года  вырас аб'ём рублёвых укладаў, а таксама рублёвыя рэшткі сродкаў на картках. Так, на 46,3 млн. рублёў вырас аб'ём тэрміновых рублёвых укладаў, а рэшткі на карт-рахунках і ўкладах «да запатрабавання» дадалі адразу 213,2 млн. рублёў, усталяваўшы максімум года на ўзроўні 3,28 млрд. руб. Гэта, хутчэй за ўсё, звязана з пачаткам сезону адпачынкаў і адпаведнымі выплатамі, а таксама квартальнымі прэміямі. Аналагічны ўсплёск назіраўся па выніках сакавіка 2021-га. Валютныя ўклады за месяц страцілі $131 млн. З пачатку года валютныя ўклады фізічных асоб скараціліся на $721,7 млн., або на 12,3%.

А са жніўня 2020-га, калі пачаўся значны адток валютных укладаў, іх агульнае падзенне склала амаль $2 млрд.

Што ў выніку?

Скарачэнне валютных укладаў фізічных асоб пакуль не спыняецца. Наколькі эфектыўным фактарам іх стрымлівання будзе павышэнне ставак па валютных укладах вышэй за 5%, пакажа статыстыка жніўня. Пакуль людзі мацней рэагуюць на бягучыя эканамічныя патрэбы (адпачынкі і выдаткі зберажэнняў), асцерагаюцца новых санкцый супраць банкаў і гучных заяў беларускіх чыноўнікаў. Рублёвыя дэпазіты стабілізаваліся на ўзроўні травеньскіх значэнняў, пры гэтым моцна выраслі рублёвыя сродкі на картках.