Трымайцеся! Планы па зборы штрафаў у бюджэце на 2023 год зноў моцна павялічылі

Колькі грошай бюджэту Беларусі прынясуць штрафы?

У рэспубліканскім бюджэце на 2023 год закладзены план па зборы штрафаў на суму, якая больш чым на 40% перавышае закладзеную ў бюджэт Беларусі на 2022 год, піша MYFIN.

Згодна з Законам «Аб рэспубліканскім бюджэце на 2023 год», у гэтым годзе ўлады плануюць зарабіць на штрафах і ўтрыманнях 191,71 мільёна рублёў.

З гэтай сумы:

— утрыманні з заработнай платы асуджаных і асоб, вызваленых ад крымінальнай адказнасці, складуць 2,63 мільёна рублёў,

— штрафы (згодна з прагнозам) прынясуць бюджэту 189,08 мільёна рублёў.

Такім чынам, у 2023 годзе ў рэспубліканскі бюджэт у выглядзе штрафаў плануюць сабраць суму на 42,7% большую, чым планавалася на 2022 год (132,47 мільёна рублёў).

Для параўнання: У законе «Аб рэспубліканскім бюджэце на 2021 год» сума запланаваных даходаў ад штрафаў складала 88,98 мільёна рублёў.

А вось у даходнай частцы рэспубліканскага бюджэту на 2020 год планавыя паступленні ад штрафаў былі блізкія да ўзроўню 2022 года — 120,82 мільёна рублёў.

Нагадаем, у пачатку гэтага года быў апублікаваны закон «Аб рэспубліканскім бюджэце на 2023 год». Даходы рэспубліканскага бюджэту ў 2023-м плануюцца ў памеры 33,36 мільярда рублёў. Выдаткі складуць 36,54 мільярда рублёў. Памер дэфіцыту рэспубліканскага бюджэту на 2023 год устаноўлены ў суме 3,17 мільярда рублёў. Дакумент прадугледжвае, што галоўным артыкулам паступленняў грашовых сродкаў стануць падатковыя даходы, а асноўныя выдаткі будуць звязаныя з агульнадзяржаўнай дзейнасцю, а таксама фінансаваннем нацыянальнай эканомікі.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: