Андрэй Любецкі ў апошнім слове: «Спецыялістаў майго ўзроўню можна пералічыць на пальцах»

«Спецыялістаў майго ўзроўню можна пералічыць на пальцах адной, максімум дзвюх рук». Палітзняволены хірург Андрэй Любецкі выступіў з апошнім словам

«Мае досвед, веды і ўменні спатрэбіліся б шматлікім людзям, калі я буду на волі і буду займацца тым, чым займаўся 23 гады. [У мяне] вельмі эксклюзіўная спецыялізацыя, і ў Беларусі спецыялістаў майго ўзроўню можна пералічыць на пальцах адной, максімум дзвюх рук.

Што датычыцца дэнтальнай імплантацыі, то і ў гэтай галіне дасягнуў дастаткова вялікіх вышынь. Я толькі канстатую факты, у тым ліку аб тым, што на лячэнне прыязджалі людзі з усёй Беларусі, і ў тым ліку з-за мяжы. Акрамя таго, з-за мяжы звярталіся тыя, каму адмаўлялі з-за складаных сітуацый ці мэтанакіравана рэкамендавалі звярнуцца менавіта да мяне», — перадаюць словы палітвязня праваабаронцы.

Нагадаем, пракурорка запрасіла для Любецкага 5 гадоў калоніі. Сківічнага хірурга, які 18 гадоў адпрацаваў у дзіцячай бальніцы ў Мінску і быў валанцёрам каля Акрэсціна, абвінавачваюць паводле чатырох артыкулаў.