Экс-кіраўнік АП Сініцын: галасаваў за Ціханоўскую. Толькі яна гаварыла, што нам патрэбныя сумленныя выбары

Былы кіраўнік Адміністрацыі Лукашэнкі, а цяпер бізнесмен Леанід Сініцын расказаў «Народнай Волі» пра свае сённяшнія перакананні і погляды на падзеі ў краіне.

— Леанід Георгіевіч, як у вас справы? Чым вы зараз займаецеся?

— Справы нармальна. Займаюся бізнесам і некаторымі культуралагічнымі праектамі.

— Гадоў пяць таму, калі мы з вамі гутарылі, вы гаварылі, што ў сферы вашых інтарэсаў — касмічныя праграмы, спадарожнікі, біржы…

— Ужо змяніў кірунак: касмічныя праекты Марс накрыў медным тазам! (Смяецца.) Цяпер у сферы маіх інтарэсаў нерухомасць, міжнародны гандаль і іншае.

— Як рэагуеце на тое, што зараз адбываецца ў краіне? Вы наогул сёння на чыім баку?

— На чыім баку? Ну, ясная справа — з народам!

— Сёння ўсе жывуць у стане напружання, якое не праходзіць. Паводле вашых прагнозаў, чым усё скончыцца?

— Напэўна, так, як раней, ужо не будзе. Гэта быў унікальны перыяд — 25 гадоў, калі Беларусь сапраўды сфармавалася як дзяржава (не да канца, але ўсё ж). І такое наўрад ці паўторыцца.

Калісьці многія інвеставалі ў параходы, але пры гэтым ужо былі дызелі. Так і цяпер — трэба ўкладвацца ў будучыню, у тое, што дае перспектыву. А старое — яно ўжо аджывае, сыходзіць. Можа, яшчэ і не заўважае, што канец блізкі, што час скончыўся, думае, што яшчэ жыве і выдатна…

Беларускае грамадства — не тое каб спелае, але ўдумлівае. Думаю, і ўлада, і апазіцыя, і народ у рэшце рэшт знойдуць агульную мову. Усё будзе добра! Але такога дастатку, як раней, пакуль не будзе. Пра гэта на нейкі час можна забыцца. Хоць імкнуцца трэба!

— Хочаце сказаць, што нас чакаюць не вельмі простыя часы?

— Так. У свеце ўсё таксама няпроста з эканомікай, агульны трэнд ідзе да паніжэння. А цяпер зачыненыя межы, санкцыі — ну якое можа быць развіццё?

— Прэзідэнцкія выбары, з вашага пункту гледжання, трэба праводзіць датэрмінова, у межах змен у Канстытуцыі?

— Лукашэнка сам сказаў, што перасядзеў, пара сыходзіць. Сказаў — рабі. Толькі патрэбныя сумленныя выбары.

— Вы ўпэўненыя, што гэта магчыма? Выбарчы кодэкс не мянялі, Цэнтрвыбаркам па-ранейшаму ўзначальвае Лідзія Ярмошына…

— Думаю, калі справа падыдзе да гэтага этапу, і Цэнтрвыбаркам будзе іншы. Але праводзіць выбары трэба толькі па-сумленнаму! Неабходна, каб і партыі былі ў выбарчых камісіях прадстаўлены. Хоць партыі ў нас і не моцна актуальныя ў грамадстве, але тым не менш. Трэба, каб незалежныя назіральнікі былі і міжнародныя таксама. І ўсё супакоіцца.

Але Цэнтрвыбаркам трэба цалкам замяніць. Апошнія выбары, якія Ярмошына праводзіла, былі правальныя.

— Калі не сакрэт, за каго вы галасавалі на мінулых прэзідэнцкіх выбарах?

— За Ціханоўскую. Яна шмат гаварыла пра тое, што нам патрэбныя сумленныя выбары. Больш ніхто з кандыдатаў на гэтай ідэі акцэнт не рабіў, а гэтыя тры дзяўчынкі ўвесь час гаварылі пра тое, што выбары павінны быць сумленнымі.