У Беларусі створаць Рэспубліканскі савет па гістарычнай палітыцы

Ён з'явіцца пры Адміністрацыі прэзідэнта. Адпаведнае распараджэнне сёння падпісаў Лукашэнка, паведамляе яго прэс-служба.

Паведамляецца, што савет стане «пастаянна дзеючым міжведамасным кансультацыйным і каардынуючым органам па правядзенні адзінай дзяржаўнай палітыкі ў сферы гістарычнай памяці».
У яго склад увойдуць вядомыя вучоныя ў галіне гуманітарных ведаў, аўтарытэтныя грамадскія дзеячы, прадстаўнікі палітычных партый, грамадскіх аб'яднанняў, экспертнай супольнасці, дзяржорганаў і арганізацый. Яны будуць працаваць на грамадскіх пачатках.
Як адзначаецца, ключавую ролю ў рабоце савета будзе выконваць Нацыянальная акадэмія навук Беларусі, на якую ўскладзена арганізацыйнае, экспертна-аналітычнае і навукова-метадычнае забеспячэнне яго дзейнасці.
У кампетэнцыі рады будуць наступныя пытанні:

• вызначэнне стратэгіі і задач гістарычнай палітыкі, распрацоўка падыходаў і мер па яе рэалізацыі;
•  каардынацыя дзейнасці дзяржорганаў і іншых арганізацый у сферы гістарычнай палітыкі і кантроль за выкананнем рашэнняў савета; 
• падрыхтоўка ў рамках кампетэнцыі праектаў нарматыўных прававых актаў і заключэнняў; 
• вывучэнне і маніторынг грамадскай думкі па сацыяльна-гуманітарных пытаннях.

Таксама савету нададуць права ініцыяваць прысваенне найменняў геаграфічным аб'ектам і іх перайменаванне, увекавечваць памяць загінуўшых воінаў, вядомых асоб, каардынаваць выдавецкую дзейнасць, у тым ліку даваць рэкамендацыі па прадухіленні і спыненні парушэнняў у галіне захавання гістарычнай памяці.