У Мінску ўшанавалі памяць Аляксея Караля (+фота)
Палітыкі, грамадскія і культурныя дзеячы, журналісты сабраліся ўвечары 16 ліпеня ў Прэс-клубе, каб ушанаваць памяць галоўнага рэдактара «Новага Часу» Аляксея Караля. Светла-сумным назвала гэты вечар Аксана Колб, бо для сустрэчы былі яшчэ дзве нагоды — выхад 500 нумару «Новага часу» і абвяшчэнне Конкурса для маладых журналістаў імя Аляксея Караля.
Учорашняя вечарына памяці — нібыта марафон па самых яскравых момантах з жыцця як самога Аляксея Караля, так і «Новага Часу». Бо жыццё былога галоўнага рэдактара і газеты — неразрыўныя паняцці.
Каштоўнымі былі ўспаміны тых людзей, якія тым ці іншым чынам былі звязаныя з Аляксеем Каралём. Мікалай Статкевіч упэўнены, што Аляксей Кароль — той чалавек, які аддаў сваё жыццё на служэнне іншым: «У той момант, калі ён ужо быў фактычна пры смерці, лагічна было б, калі б ён думаў толькі пра сваіх родных і блізкіх. Але ў той час ён падтрымліваў, як мог, усіх, і мяне таксама. А я нават падумаць не мог, што ён — пры смерці».
Алена Анісім узгадвала нараджэнне «Новага Часу»: «Ніхто не думаў тады, што будзе ў «Новага Часу» і 500 нумар».
А Алесь Бяляцкі прызнаўся, што ў свой час паставіўся досыць скепчычна да стварэння газеты: «Якое новае выданне? Усе газеты толькі закрываліся!».
Да віншавання з юбілейным нумарам далучыліся многія. На вечарыну завіталі і прадстаўнікі Беларускай Асацыяцыі журналістаў — Жана Літвіна, Аліна Суравец і Вольга Хвоін.
Зінаіда Цімошак, Мечыслаў Грыб, Станіслаў Багданкевіч, Дзяніс Лаўнікевіч
Таццяна Рэвяка, Алег Волчак
Аляксандр Тамковіч
Аляксандр Давыдоўскі, Алена Анісім, Алесь Ліпай, Валярына Кустава
Міхаіл Пастухоў
Андрэй Расінскі
Леанід Лыч, Мікола Савіцкі
Георгій Ліхтаровіч
Мечыслаў Грыб
МІхаіл Пастухоў
Раіса Міхайлоўская
Алена Лапцёнак
Уладзімір Сіўчыкаў
Станіслаў Багданкевіч
Вікторыя Чаплева
Андрэй Плясанаў
Алена Макоўская і Марына Адамовіч
Галоўная рэдактарка «Новага Часу» Аксана Колб сумна прыгадала, што днями ў чарговы раз — трэці ў гэтым годзе — выданню адмовілі ў продажы ў шапіках «Белсаюздрука» і ў распаўсюдзе праз пошту. Але пасля дадала: «А мы ўсё адно будзем выходзіць».
Частка каманды "Новага Часу"
Асобнай падзеяй гэтага вечара стала абвяшчэнне «Новым часам» Конкурса маладых журналістаў імя Аляксея Караля. Прыняць удзел у ім могуць маладыя людзі да 30 гадоў. Пры гэтым не абавязкова мець журналісцкую адукацыю ці досвед журналісцкай працы. Патрэбныя толькі жаданне пісаць, валоданне словам і цікавая тэма.
Падрабязней пра конкурс можна даведацца на адмысловай старонцы сайта.
Напрыканцы мерапрыемства гасцей чакала музычная частка. На вечарыне выступілі Андрэй Плясанаў, гурт «Вурай» і Андрэй Сянкевіч.
Гурт "Вурай"
Фота Арцёма Лявы