«Калі сабаку няма чаго рабіць, ён фарбуе будку. А калі камусьці страшна, ён складае планы сваёй абароны»
Тэлеграм-канал «Лісты да дачкі» — пра планы абароны Лукашэнкі з дапамогай невядомай колькасці «Арэшніка».
Крыніца newpix.ru
Сёй-той у чацвер быў заняты важнай справай, піша тэлеграм-канал. Сёй-той у чацвер зацвярджаў план сваёй абароны на бліжэйшую пяцігодку. Я нават не буду з гэтай нагоды замілоўвацца: а хто тут у нас такія аптымісты? А хто тут у нас думае, што ў перспектыве пяцігодкі яму будуць актуальныя планы абароны?
Я табе пра іншае скажу. Вось план абароны сёй-той зацвярджаў літаральна нядаўна. А яшчэ зацвярджаў загад на ахову дзяржаўнай мяжы. І планы аператыўнага рэагавання на змяненне ваенна-палітычнага становішча. І стратэгічныя адказы на знешнія выклікі. І тактычныя адказы сёй-той таксама зацвярджаў рэгулярна.
Праўда, пяцігадовых планаў сёй-той пакуль не зацвярджаў. А сёй-той любіць пяцігадовыя планы. Пяцігадовыя планы даюць камусьці прыемнае пачуццё ўпэўненасці ў сваім заўтрашнім дні. Калі ты запланаваў што-небудзь на пяць гадоў наперад, то ўзнікае ілжывае адчуванне, што ў цябе будзе заўтрашні дзень. І не толькі ў цябе. Галоўнае, што яно ўзнікае ў тваіх генералаў.
А ў сэнсе практычнай карысці пяцігадовага абарончага плана я трохі сумняваюся. Вядома, мы не ведаем усіх дэталяў. Мы наогул ніякіх дэталяў не ведаем. Але ў мяне ёсць смутнае адчуванне, што генералы, якія планавалі гэты план, пра ўсе дэталі таксама не ў курсе.
Таму што ключавая, як я разумею, дэталь плана абароны — гэта нябачныя свету ядзерныя боегалоўкі і баявы «Арэшнік» Шродзінгера. Ну, з боегалоўкамі усё зразумела. Нябачныя боегалоўкі ўжо нябачна размясцілі. А да «Арэшніка» ў мяне маюцца пытанні.
Вось генерал Муравейка сказаў, што сёй-той даў генералам дэталёвае даручэнне дэталёва вызначыць месцы размяшчэння і дэталёвыя спосабы прымянення гэтай зброі. Але калі генерала Муравейку спыталі, колькі ўсяго будзе «Арэшніка», ён адказаў, што пра гэта ведае толькі Пуцін.
Глядзіце таксама
То-бок сёй-той дэталёва даручыў сваім генералам дэталёва размясціць невядомую сучаснай навуцы колькасць «Арэшніка». Таму што калі б колькасць была вядомая, то з размяшчэннем на месцах мог бы справіцца любы дурань. А з дэталёвым размяшчэннем невядомай колькасці зброі любы дурань не справіцца. Справяцца толькі беларускія генералы.
Атрымліваецца, што беларускія генералы, дзякуючы гэтаму плану, будуць занятыя важнай і карыснай справай. Яны будуць шарыцца па карце, каб знайсці на ёй месца для размяшчэння невядомай колькасці«Арэшніка». І ў гэтым, як я разумею, палягае сутнасць пяцігадовага плана абароны: невядома дзе размясціць невядомую колькасць невядомых навуцы ўзбраенняў, каб абараняцца ад невядомага праціўніка.
І гэта, па-мойму, выдатны план. Дакладны, ххх, як швейцарскі гадзіннік.
А таму, што сэнс не ў плане. Калі сабаку няма чаго рабіць, ён фарбуе будку. А калі камусьці страшна, ён складае дэталёвыя планы сваёй абароны. Можна падумаць, у выпадку раптоўных крытычных ускладненняў, ён будзе гэтымі планамі абараняцца. Я падазраю, што ў выпадку раптоўных крытычных ускладненняў гэтыя планы спатрэбяцца для іншых мэтаў. І гэта добра, што ў пяцігадовым плане напэўна шмат старонак.
Вось я чамусьці ўпэўнены, што ў Асада, раптоўная эміграцыя якога зрабіла на кагосьці такое моцнае ўражанне, планы абароны былі яшчэ больш дэталёвыя. І што, моцна яму гэтыя планы дапамаглі? З усіх планаў яму спатрэбіўся толькі план эвакуацыі.
Ну, і я не сумняваюся, што ў кагосьці такі план напэўна ёсць. А вось беларускім генералам над планамі сваёй асабістай эвакуацыі варта было б, вядома, добра папрацаваць. Таму што на ўсіх генералаў месца ў эвакуацыі не хопіць.