«Як высветлілася, ніякага «Арэшніка» не існуе. А калі не існуе, то чаму б не паабяцаць яго ў сябе размясціць»
Тэлеграм-канал «Лісты да дачкі» — пра «красаўцаў», сведкаў стабільнасці і пуцінскі «Арэшнік».
Днямі высветліліся новыя падрабязнасці наконт таго, як беларускія ўлады не ўдзельнічалі ў вайне супраць Украіны, піша тэлеграм-канал. Асобныя «экстрэмісты» ўстанавілі, што ў дваццаць другім годзе ў Нароўлі дзейнічаў расійскі лагер для ўкраінскіх палонных. У якім катавалі ўкраінскіх вайскоўцаў, цывільных і нават дзяцей.
І вось скажы мне, чаму я не здзіўлены? Наогул ні кропелькі. А таму што стварэнне лагера, катаванняў для ваеннапалонных, грамадзянскіх і дзяцей гэта тое, што адпавядае ўяўленням беларускіх «красауцаў» пра гонар, доблесць і воінскую славу.
«Экстрэмісты» не ўстанавілі, ці ўдзельнічалі самі беларускія «красаўцы» ў катаваннях. Але я падазраю, што цалкам сабе маглі. Ну, таму што трэба ж неяк аддаць саюзніку свой саюзніцкі абавязак.
А як ты яго яшчэ аддасі? Ну, не ваяваць жа ім на самай справе! Ты што! На вайне ж можна параніцца. Не кажучы ўжо пра фатальныя парушэнні цэласнасці арганізмаў. А «красауцы» на такое не наймаліся, каб рызыкаваць цэласнасцю сваіх арганізмаў. Яны вунь, бывае, ад смайліка атрымліваюць такія невыносныя душэўныя траўмы, што потым даводзіцца гаіць ўсім баявым братэрствам.
У «красауцау» іншыя паняцці аб воінскіх подзвігах. Ну, там, групай захопу ў поўнай баявой экіпіроўцы захапіць у палон пенсіянерку. Або разнесці дашчэнту і напалову пустую кватэру. А лепш за ўсё катаваць палонных. Вядома, не ў адзіночку і пажадана, каб палонныя былі ў кайданках.
Глядзіце таксама
Вось літаральна ўчора баец інфармацыйнай вайны Казакоў пахваліўся сваімі будучымі подзвігамі. Сказаў, што гатовы асабіста, гэта значыць, пры падтрымцы двух спецыяльна навучаных таварышаў, расстраляць блогера Мелказёрава.
Заўваж, ён не сказаў, што гатовы выйсці супраць блогера Мелказёрава. Хоць бы ў суадносінах тры да аднаго. Зразумела, што ён бы нікуды не выйшаў. Але яму ж нават не прыйшло ў галаву гэтым пахваліцца, седзячы ва ўласным бяспечным тэлевізары. Таму што вышэйшая праява гераізму для сведак стабільнасці — расстраляць палоннага, якога ім прывядуць са звязанымі рукамі. А на іншыя подзвігі сведкі стабільнасці не здольныя нават у сваім уяўленні.
А таму што якая стабільнасць, такія ў яе і сведкі. Не кажучы ўжо пра гаранта. Вось гарант стабільнасці гераічна пахваліўся, што гатовы размясціць у Беларусі пуцінскі «Арэшнік». Заўваж, зноў жа, пахваліўся без усякай рызыкі для арганізма сваёй стабільнасці. Таму што, як высветлілі разумныя людзі, ніякага «Арэшніка» ў прыродзе не існуе. А калі яго не існуе, то чаму б не паабяцаць яго ў сябе размясціць. Гэта і гераізм, і арганізмам рызыкаваць не трэба.
Таму што ў гераізме сведкам стабільнасці галоўнае што? Галоўнае, каб гераізм быў без рызыкі. Таму ваяваць лепш супраць мірнага насельніцтва. У суадносінах, як мінімум, тры да аднаго. А перамагаць у сябе ў тэлевізары неверагоднага праціўніка. Таму што верагодны праціўнік можа ж і адказаць.