Лукашэнка выступіў перад вайскоўцамі. Пра ДНР і ЛНР не сказаў нічога

Прамова тычылася 23 лютага.

22 лютага Аляксандр Лукашэнка прамаўляў перад вайскоўцамі з нагоды Дня абаронцаў Айчыны і Дня Узброеных Сіл РБ, піша «Еўрарадыё». Ён нічога не сказаў пра прызнанне Расіяй незалежнасці і суверэнітэту ЛДНР і пра тое, як адрэагуе афіцыйны Мінск. Але звярнуўся «да ўкраінскага народа і кіраўніцтва». «Давайце зробім так, каб мы, славяне, заўсёды жылі ў міры і згодзе», — гаварыў Лукашэнка. Ён прапанаваў украінцам: «Спыніцеся, адмахніцеся ад гэтых заакіянскіх гаспадароў. Ніякага шчасця яны вам не прынясуць».

Аляксандр Лукашэнка хоча, каб «Беларусь была мірным астраўком на гэтай звар'яцелай планеце». Ён заклікаў вайскоўцаў не панікаваць: «Як жылі мы, так і будзем жыць». І дадаў, што ў Захаду не атрымаецца «расстраляць рускіх у спіну праз Беларусь», бо «здраднікамі ніколі не былі і не будзем».

Лукашэнка заявіў, што ваеннае супрацоўніцтва з Расіяй будзе развівацца, ён дапускае правядзенне новых вучэнняў з РФ, набыццё новых узбраенняў.